Өткен аптада әншіні де, ақынды да, батырды да дүниеге әкелген киелі өлкеде дүбірлеген мереке өтті. ШҚО мәдениет, мұрағаттар және құжаттама басқармасының басшысы Нұрболат Ахметжановтың қолдауымен, аудан әкімі Әнуарбек Мұхтархановтың арнайы шақыруымен халықтың ыстық ықыласына бөленіп жүрген Семейдің өнер ұжымы облыстық Әміре Қашаубаев атындағы мемлекеттік филармониясы Жарма ауданының орталығы Қалбатау ауылында концерт қойды. Еліміздегі ірі облыс-тардың бірі болып саналатын Шығыс Қазақстанның дәл ортасында орналасқан Жарма өлкесі Әди Шарипов, Әзілхан Нұршайықов сынды жазушылар мен ҚР Халық әртісі, Қазақ эстрадасының жарық жұлдызы Роза Рымбаева және ҚР мәдениет қайраткері, әнші Салтанат Сыбанбаева сынды өнер майталмандарын және ел игілігі үшін туған жерінің төріне спорт кешенін салып берген, қазақтың даңқты палуаны Дәулет Тұрлыханов сынды спорт сайыпқырандарын, сол сияқты ШҚО мәдениет, мұрағаттар және құжаттама басқармасының басшысы Нұрболат Ахметжанов, ҚР мәдениет қайраткері, Моңғолияның Құрметті азаматы Адай Азаматов сынды азаматтарды және басқа да, жалпы, қай салада да болмасын асығы алшысынан түскен талай тарланды түлеткені белгілі. Осындай талант иелерін тудырған мекендегі мерекені жоғары дәрежеде өтті деуге болады. Жарма ауданына үлкен шығармашылық кеш өткізіп, сонымен қатар, туған жерге тағзым жасап, өнер иелерін жұртпен қауыштыруға ықпал еткен Әміре Қашаубаев атындағы мемлекеттік филармониясының директоры Адай Азаматовтың еңбегінің ерекше екенін айта кеткен жөн болар.
{jcomments on}Аталмыш өнер ұжымының Қалбатау орталық алаңынан бастау алған концерті аудандық мәде-ниет үйінде жалғасты. Концерт барысында Адай Азаматовтың сөзіне жазылған әндер де орындалды. Мысалы, «Асыл Жарма» атты Тұрсынғазы Рахимовтың әнін Салтанат Сыбанбаева орындаса, «Жан жарым» атты Мәуліт Рахымбаевтың әнін Қадылбек пен Маржан Омаровтар орындады. Толғанбай Сембаев, Мапруза Өтеленова, Айдын Өмірбеков, Гүлдана Ноғайбаева сынды күміс көмей, жезтаңдай әншілер мен Айнұр Асқар сияқты мың бұралған бишілердің өнеріне жұрт тәнті болып, ерекше қошемет көрсетіп, ыстық ықыластарын аямады. «Туған жерге тағзым» акциясы аясында концерт қойған өнер ұжымы жергілікті жұрттың ақ батасын алып қайтты.
Мерей ҚАРТОВ, Семей қаласы.
