Туберкулез ауруына қарсы емдеу жұмыстарын жүргізіп, тәжірибе алмасу мақсатында Семейге Қырғызстан мен Тәжікстанның және еліміздің өзге де аймақтарынан медицина саласының майталман мамандары келді. Мамандар Семейге өткен жылы да арнайы келіп, туберкулезбен ауыратындардың әлеуметтік қорғалуымен танысып қайтқан еді. Ал, биыл делегация амбулаториялық қызмет және науқастарды тұрақты түрде емдеу жұмысымен танысты. Осыған орай, дүйсенбі күні қала әкімінің орынбасары Зәуреш Исабаева мен жергілікті медицина саласының мамандары әкімдікте делегаттармен ресми түрде кездесу өткізіп, жан-жақты пікір алмасты.
ШҚО денсаулық сақтау басқармасы басшысының Семей өңірі бойынша орынбасары Ғалия Жуасбаева Семей өңірінде медицина саласы жетекші сала екендігін әрі Семей қаласының «брэнді» болып табылатынын атап өтті.
{jcomments on}- Семей халқының саны 350 мыңға жуық болса, мұнда 35-тей медициналық-әлеуметтік мекеме, 11 отбасылық дәрігерлік амбулатория және 12 емхана жұмыс істейді. Рентгендік тексеруден бастап, туберкулез ауруын бақылау жасауға тубдиспансерлермен бірігіп жұмыс істеуге мұның әсері мол. Адамның медициналық мекемемен жасайтын бірінші қатынасы отбасылық дәрігерден басталады. Олар отбасындағы барлық адамдарды жақсы танып қана қоймай, оларды қандай аурудың мазалайтынынан да хабардар болады. Сондықтан, дәрігерлерге бұл дертті бақылауға жеңіл болады,- деп атап өтті өз сөзінде Ғалия Жуасбаева.
Сонымен қатар, семейлік мамандар туберкулезге шалдыққан науқастарды тұрақты емдеудегі тәжірибелерін де осы жерде ортаға салды. Ал, науқастарды тұрақты емдеуде әлеуметтік қолдаудың да рөлі ерекше екені даусыз.
— 2009 жылы туберкулезге шалдыққандарға қаржылай көмек көрсетуге бізде жаңа мүмкіндік пайда болды. 120 адамды қамтитын ай сайынғы төлемақы басында 3 мың теңге болса, бүгінде 6,5 мың теңгені құрайды, — дейді қалалық жұмыспен қамту және әлеуметтік бағдарламалар бөлімінің сектор меңгерушісі Разина Булешова.
Бұл тұрғыда тәжірибе алмасу мақсатында жақын маңдағы шетел мамандары Семейде осыдан бірнеше жыл бұрын да сапарлап келіпті. Алғашында олар USAID ТВ CARE жобасы аясында келген екен.
— Туберкулезге қатысты бағдарлама бойынша тәжірибе алмасуда біз 2009 жылдан бері түрлі кездесулер өткізіп келеміз. Еліміздің қай өңірінен болмасын, мамандардың бұл мәселеге қатысты өз айтар ойлары бар әрі тәжірибелері де жеткілікті. Өткен жылы Тәжікстан, Қырғызстан және Өзбекстан мемлекеттерінен әріптестерімізді шақырып, олармен осы тақырып тұрғысында тәжірибе алмастық. Ал, жақында ғана Тәжікстанда болғанымызда олардың Семейден алған тәжірибелерінің жүзеге асып жатқандығын байқадық. Қазіргі таңда оларда да осындағы сияқты туберкулезге шалдыққандармен тек қана дәрігерлер емес, әлеуметтік қызмет тобы да жұмыс жасайды екен. Мұндай кездесулердің туберкулезді бақылауда пайдасы мол деп айтуға болады, — деген Қазақстандағы ТВ CARE жобасының директоры Мария Идрисова Семейдің туберкулезге қарсы күрес жұмысын жүргізу жағынан тәжірибесі мол екенін айтып өтті.
Сонымен қатар, жиын барысында еліміздің өзге де аймақтарынан келген делегаттар пікірлерін білдіріп, өз тәжірибелерімен бөлісті. Мысалы, Ақмола облысындағы аудан әкімдері туберкулезге шалдыққандарды өз бақылауына алған екен. Ондағы жергілікті кәсіпкерлермен бірлесе отырып, аудан әкімдері туберкулезге шалдыққан науқас адамдарға әлеуметтік көмек көрсететін көрінеді. Айтуларынша, науқастардың үйлерін көмір мен ағаш сияқты отын түрлерімен, азық-түлік өнімдерімен қамтамасыз етуді қолға алыпты. Мұндай жағдай алдағы уақытта еліміздің барлық өңірлерінде де қолға алынатынын айтады жиынға қатысушылар. Тараптар тәжірибе алмасуы барысында кездесуде айтылған ұсыныстары сол жерде қалмайтындығын, алдағы уақытта міндетті түрде жүзеге асатындығын айтып тарқасты.
Нұрдәулет КӘКІШЕВ, «Семей таңы»
