Өткен аптада Шығыс қазақстан облысының прокуроры Бағбан Тайымбетовтің төрағалық етуімен қалалық әкімдікте кәсіпкерлердің құқығын қорғау кеңесінің отырысы өтті. Жиынға Семей қаласының әкімі Айбек Кәрімов, ШҚО прокурорының орынбасары Василий Олейник және ШҚО кәсіпкерлер палатасының директоры Игорь Шацкий, сонымен қатар, құқық- қорғау органдарының қызметкерлері мен әкімдіктің бөлім басшылары, коммуналдық қызмет мамандары, кәсіпкерлер қатысты.
Жиында негізінен кәсіпкерлер алдында кездесетін кедергілер жайы талқыланып, оның шешілу жолдары қарастырылды. Кәсіпкерлерге өздерінің мәселелерін нақты және түсінікті түрде баяндауды сұраған облыс прокуроры айтылған мәселелер назардан тыс қалмайтындығын, оның барлығы қысқа мерзімде Заң шеңберінде шешілетіндігін жеткізді.
Б. Тайымбетов жиын басында кәсіпкерлерге мемлекет тарапынан қолдаудың жеткілікті деңгейде екендігін, қолынан іс келетін азаматтарды қашан да демеп, бағыт – бағдар көрсетіп, кәсібін дөңгелетіп әкетуге септігін тигізіп отырғанын атап өтті.
— Елбасының Жарлығына сәйкес, жарияланған мара-торий кәсіпкерлер үшін өте тиімді. Алайда, кәсіпкерлер келісілген міндеттерінен жалтаратын болса, жауапкершілікке тартылатын болады, — деп атап өтті Б.Тайымбетов сөзінің басында.
Жиын барысында құрылыс саласына қатысты бірқатар мәселелер көтерілді. Кәсіпкерлер мемлекеттік сатып алу конкурсы барысында жобалық-сметалық құжаттардың сәйкес келмей жататындығына налыды. Сондай-ақ, құрылыс материалдарының бағасы жайлы да сөз етіп, жұмыс кестесі көңілдерінен шықпайтындығын да жеткізді. Қыс мезгілінде құрылыс жұмыстарын тоқтата тұрып, жазғы уақытта екі есе жұмыс күші жұмылдырылса деген ұсыныстарын да білдіргендер болды. Бұл орайда қала басшысы сөз алып, өңірде жобалық-сметалық құжаттаманы әзірлеумен айналысатын бірде-бір мемлекеттік мекеменің жоқ екендігін, ал, бұл тұрғыда жекелеген кәсіпкерлермен жұмыс істеу біраз қиындық тудыратындығын айтты.
— Құрылыс саласы жұмыстарына қатысты тендер облыстық құрылыс басқармасы арқылы өтеді. Алайда, біз мердігерлерді әрдайым қолдауға дайынбыз. Ал, жобалық-сметалық құжат мәселесіне келсек, расымен қиындықтар аз емес. Дегенмен, қаладағы тағы бір атап айтарлық мәселе – құрылыс жүргізуге арналған жер учаскелері жеткіліксіз. Бүгінгі таңда тұрғын үйлер мен мектептер және балабақшалар салу үшін бос тұрған ыңғайлы жерлерді табу да қиынға түсуде, — дейді А.Кәрімов.
{jcomments on}Сондай-ақ, қаладағы Жұмабаев көшесіндегі тұрғын үйлер қасынан екі қабатты дүкен ғимаратын салуға тұрғындардың қарсылық танытып, құрылыс жасауға бөгет болып жүргендігін айтқан кәсіпкер Руслан Ескендіров облыс прокурорынан бұл мәселені қалай шешуге болатындығы жайлы сұрады.
— Тұрғындармен сыпайы түрде сөйлесуіңіз керек. Бір жағынан олар сіздің болашақ тұтынушыларыңыз ғой. Егер сіздің құжаттарыңыз Заңға қайшы келмесе, құрылыс жүргізуге бөгет жасауға ешкімнің де хақысы жоқ, — деді Б.Тайымбетов.
ШҚО прокуроры Б.Тайымбетов ауылшаруашылығы саласындағы кәсіпкерлердің құқығын қорғау жөнінде тексерістің басталғандығын да атап өтті. Тексеріс шамамен екі ай көлемінде өтпек. Жиын соңында Бағбан Тайымбетұлы кәсіпкерлер көтерген барлық мәселелер бойынша жұмыстар жүргізіліп, тек Заң шеңберінде арнайы шаралар қолданылатындығын айтты.
Нұрдәулет КӘКІШЕВ,
«Семей таңы»
