Семейде қаласындағы ауқымды түрде өткен 31 мамыр саяси қуғын — сүргін құрбандарын еске алуға арналған шаралардің бірі — Қаз ИГЗУ -де ашылған «Алаш» ғылыми зерттеу орталығымен ашылуымен жалғасты. Делегаттар алдымен университеттің оқытушылық-профессорлық құрамымен ауладағы «Алаш аллеясында» қарағай ағашын отырғызды. Содан кейін, қонақтар ішке еніп, «Қазақстан жолы» орталығында болды. Елбасы ұсынған «Мәңгілік Ел» ұлттық идеясын насихаттау, студенттердің отаншыл да патриот болып қалыптасуы үшін арнайы әзірленген орталықтың мүмкіндіктерімен де танысты.
Жалпы, мұнда студенттер Елбасының кітаптарын оқып, Жолдауларымен танысып, деректі фильмдерді тамашалап, пікір алмаса алады. Орталық жас буыннан бастап, университет түлектерімен де тығыз байланыс орнатып, жұмыс жасауда. «Алаш» ғылыми-зерттеу орталығының ашылуы әлбетте, алаштану мәселесін терең зерттеуге мүмкіндіктер туғызады. Жалпы, орталықта қазірдің өзінде біршама еңбектер топтастырылған. «Алаш» серия-сымен алғашқы кітаптар да жарық көріп жатыр екен. Үш тілдегі Шығыс Қазақстан атласы да осы орталықта алғаш рет жарыққа шыққан. «Алтай — түркі әлемінің алтын бесігі» сынды тағы бірнеше сиясы кеппеген еңбектерді де орталықтан кездес-тіруге болады. Аталмыш орталық тек Алаш зиялыларын танумен ғана емес, өнер, білім, ғылым мен мәдениет саласында еңбек еткен репрессия құрбандарын зерттеуге арналған.
{jcomments on}Осы жиында педагогикалық кеңестің шешімімен ҚР Президенті Әкімшілігі Басшысының орынбасары Бағлан Майлы- баевқа «Университеттің құрметті профессоры» атағы берілді. Бұл дәрежені үлкен мәртебе санайтындығын айтқан Б.Майлыбаев:
— Елбасының негізігі идеясы -«Мәңгілік Ел» идеясын жүзеге асыру, ХХІ ғасырда бәсекеге қабілетті, білімді ұрпақ тәрбиелеу. Аталмыш университет бұл тұрғыда белсенділік танытып отырғанын аңғарып отырмыз. Жаңа ғимарат ашу арқылы студенттерге көптеген технологиялық даму, білім алуға зор мүмкіндік сыйлап отырсыздар. Осы ЖОО-нан түлеп ұшқан түлек елінің тұтқасын ұстайтын азамат болып, биіктерден көрінсін! «Қазақстанның болашағын көргім келеді» деген адамға Семейге келіп, ҚазИГЗУ-де білім алыңыз деп айтар едім, — дей келе, құрметті профессор жаңашыл, бастамашыл университет ректоры Шырын Құрманбаева мен ұжымына өз алғысын жеткізді.
Мұндай тағылымы мол шараға алғаш рет қатысып отырмаса да, тол-қып тұрғанын айтқан ҚР Парламент Мәжілісінің депутаты Егор Каппель:
— Семей қаласына, Алаш қаласына келгенім үшін өте қуаныштымын. Қазақтың рухани астанасы, Алаш Орданың орталығы болған шаһардың қашан да мерейі үстем. Себебі, дәл осы киелі жерде алашордалықтар елдің болашағы үшін кесімді пікірлер айтып, шешімдер қабылдаған. Олар ұлт болашағы үшін репрессияға ұшырады. Біз алашордашылардың ел болуға ұмтылған ұмтылысын, отан-сүйгіштіктерін ешқашан санамыздан шығармауымыз керек. Сол қасірет қайталанбас үшін өскелең ұрпаққа тарихымызды сусындатуымыз керек. Ұйымдастырылып жатқан шаралардың басты мақсаты да сол,- деді.
Әйгерім СӘРСЕНҒАЛИ, «Семей таңы»
