Мемлекет тарапынан отандық өндірісті, кәсіпкерлікті дамытуға кең қолдау көрсетілуде. Бұл орайда бағыт – бағдары айқын мемлекеттік бағдарламалар халық игілігі үшін жұмыс жасауда. Осындай берері мол бағдарламаның бірі – «Жұмыспен қамтудың жол картасы — 2020» бағдарламасы. Маңызды бағдарламаның ойдағыдай жүзеге асырылып жатқаны ауылдарда да кең көрініс табуда.
Соның бірі — мал өсіріп, кәсіп жасаймын деген азаматтарға мемлекеттен несие беру жолдары қарастырылғаны. Бірінші кезекте өз бетімен жұмыс істеуге бел буған азаматтарға және табысы төмен отбасыларға беріледі. Абыралы өңіріндегі ауылдық округтерде мал шаруашылығын дамытуға бағытталған төмен пайыздық несие алып, шаруасын бастап, оны ойдағыдай жүргізіп жатқандар бар.
Әрине, бизнеске қашан да тәуекел қажет. Тәуекелге бел буып, ойындағы істерін жүзеге асыруға бекінген жандар ерлі – зайыпты Жомарт пен Шынар. Бірде ауылға қаладан мамандар келіп, кәсіпкерлік іс бастаймын, мал өсіремін дегендерге несие беру жөнінде жиын өткізеді екен дегенді естіген Жомарт пен Шынар жиынға арнайы қатысады. Көптен күткен өзгеріс осы жиналыста қылаң бергендей болды.
Үкімет қолға алған «Жұмыспен қамтудың жол картасы — 2020» бағдарламасының жай-жапсары, несие алудың тәртібі түсіндірілгенде бәрі жас отбасының көңілінен шығады. Ойлана келіп, Жомарт пен Шынар жоба құжаттарды дайындап, тиісті орындарға тапсырды. Олар ұсақ мал, яғни, қой алып, оның басын көбейтуді көздеді. Өткізген құжаттары оң шешімін де тапты. «Қайнар несиеден» 3 млн. теңге беріліп, оған 80 бас саулық қой, қыстамада малды күтуге жем-шөбін сатып алды.
Халқымыз «Әрекет түбі- берекет» деп бекер айтқан жоқ. Бағдарлама негізінде ата кәсіп — қой шаруашылығын дамытуға, оны өз төлі есебінен көбейтіп, алған несиені мезгілінде қайтару үшін аянбай еңбек етуде. Кәсіпке кіріскен отбасы да мал өсірудің де сырын біледі. Өйткені, Жомарт Асаубаев пен зайыбы Шынар Жүнісова ауылда туып – өсіп, ауыл тірлігіне көздері әбден қаныққан жастар. Қандай да бір табыстың, ауыз толтырып айтуға болатын жетістіктің бәрін еңбек адамының құдіретті қолының күшімен жасайтыны кімге болса да белгілі. Олар қолға алған ісін аяғына дейін жеткізгенше тыным таппайтын еңбекқор жандар десек қателеспейміз. Әр шаруаға жауапкершілікпен қарап, тиянақты атқарады.
{jcomments on}-Кәсіпкерлікті, шағын және орта бизнесті дамытуға бағытталған бағдарламалардың тиімділігі бар. Игілігін көру- әркімнің өз ынта- ықыласына байланысты. Кәсібің- нәсібің болады,- дейді кәсіпкер Шынар.
Жомарт пен Шынар әрдайым жақсы жағын көрсете білетін жас жанұялар қатарынан. Әрдайым өздерін жақсы жақтарынан ел ауызында. Нарықтық қиындығы, жұмыссыз қалу оларды да айналып өтпеді. Еңбек етіп жүрген мекемелері қысқарып, жабылды. Бірақ жас отбасы жасымады, тірлік жасап,қолдарынан келген шаруамен айналысты. Шынар ұсақ-түйек заттар әкеліп, сауда жасады. Тиыннан теңге құрап, табыс көзін кіргізді. Олар ешқашан ерінуді білмейді, өте тәуекелшіл. Оны бүгінде атқарып жатқан шаруаларынан анық байқаймыз. Ауылдағы мәдени-көпшілік іс-шараларға атсалысып, демеушілік үлестерін қосудан шет қалмайтынының куәсіміз. Жағдайы төмен отбасыларына қайырымдылық қолұшын беріп те жүреді.
Бойларындағы қарапайымдылық, адамгершілік ақкөңілділік қасиеттерімен көпшілікке сыйлы, үлгілі отбасы. Кәсіпкерлікті бастаған олар алдағы күндерге үлкен үмітпен қарайды.
Қазима ҚАЖЫБЕКОВА,
«Семей таңы»
