Өткен жұма күні қалалық әкімдіктің кіші залында қала әкімі Айбек Кәрімов пен шаһардағы бірқатар өндіріс орны басшыларының қатысуымен дөңгелек үстел өтті. Жиын барысында қала әкімі мен кәсіпорындар басшылары бизнестің әлеуметтік жауапкершілігі жөніндегі меморандумға қол қойды.
Елбасының тапсырмасына сәйкес, меморандумға қол қойған кәсіпорындар қалаға инвестиция тартуы қажет және жұмысшылардың еңбекақысын кем дегенде 10 пайызға көтеруі тиіс. Сонымен қатар, әлеуметтік жағынан аз қамтылған отбасыларға көмек көрсетуі керек. Семейде 9 ірі өндіріс орны және қанша шағын және орта бизнес кәсіпорындары бар болса, барлық кәсіпорындармен қалалық әкімдік осы мәселе бойынша келіс-сөздер жүргізуде. Әзірге «Казполиграф» ЖШС-нің бас директоры Жұмабек Ибраев, «Силикат» ЖШС-нің бас директоры Борис Адианов, «Қаражыра ЛТД» ЖШС-нің директоры Марғұлан Мәкішев және «Семей асбестцемент бұйымдары зауыты» ЖШС-нің бас директоры Сейтхасым Тамбетов аталмыш меморандумға қол қойып, Елбасының саясаты мен жергілікті биліктің атқарып жатқан жұмыстарын қолдайтындықтарын жеткізді.
— Қаламыздағы 9 ірі кәсіпорындардың басшыларымен бір келісімге келдік. Олардың барлығы ұсынымызды қабыл алып, қол қоюға келісімдерін берді. Өздеріңіз көргендей, әзірге 4 өндіріс орнының басшылары қол қойды. Ал, қалған кәсіпорын басшылары өз кезектерінде қол қоятын болады. Сондай-ақ, қаладағы шағын және орта бизнес кәсіпорындарының басшыларымен де осы мәселе бойынша жұмыс жүргізіліп жатыр. Жалпы, ірі кәсіпорындар қаладағы әлеуметтік жағынан аз қамтылған отбасыларға өздерінің жеткен жетістіктеріне байланысты 5 млн. теңгеден бастап, 20 млн. теңгеге дейін көмектерін көрсететін болды, — дейді қала басшысы Айбек Кәрімов.
Ал, «Қаражыра ЛТД» ЖШС-нің директоры Марғұлан Мәкішевтің сөзіне сүйенсек, аталмыш кәсіпорын зейнеткерлер мен әлеуметтік жағынан аз қамтылған отбасыларға және Ауған соғысы ардагерлеріне жылына 25 млн. теңге қаржы көлемінде де-меушілік көрсетеді екен. Сонымен қатар, 9 млн. теңгені кәсіпорын жұмысшыларының отбасын көмірмен тегін қамтамасыз ету үшін бөлетін көрінеді.
— Меморандум бойынша биыл жұмысшылардың жалақысы 15 пайызға артатын болады. Жалпы, соңғы 3 жылда жалақы 45 пайызға өсті. Қазіргі уақытта біздегі жұмысшылардың орташа жалақысы 102 мың теңгені құрайды, — деген Мар-ғұлан Мәкішев биылғы жылы 500 млн. теңгеге инвестиция тартқандықтарын да атап өтті.
{jcomments on}«Семей асбестцемент бұйымдары зауыты» ЖШС-нің бас директоры Сейтхасым Тамбетов те журналистер тобына берген сұхбат барысында, өздерінің атқарып жатқан жұмыстары жайлы мағлұмат берді.
— Бизнестің әлеуметтік жауапкершілігі жөніндегі меморандумда көрсетілген жайттармен келісе отырып, қол қойдық. Енді осы меморандумға сәйкес, биыл жұмысшылар жалақысын 10 пайызға көтеруді жоспарлап отырмыз. Сонымен қатар, біздің кәсіпорын Мұқыр кентіне жыл сайын қаржылай көмек көрсетеді. Аталмыш кентті су басып кетпес үшін Мұқыр өзенін тазарту жұмыстарын да жүргізіп отырамыз, — дей келе, Сейтхасым Ғаббасұлы, — Бизнесті дамыту бағытында мемлекет тарапынан үлкен қолдау бар. Биылғы жылы біздің кәсіпорын мемлекеттік бағдарлама арқылы 220 млн. теңге көлемінде пайыздық төлемі аз несие алып, нәтижесінде өндіріс орнында газоблок шығаратын жаңа цех ашылмақ. Бұл құрылыс мате- риалы дәл біздің облыстағыдай суық климатты жерлерде тұрғын үй салуға қолданылады. Бағасы да қол жетімді. Сонымен қатар, «TERRAZZO» деп аталатын итальян- дық технология бойынша әлі де елімізде өндірілмейтін құрылыс материалдарын шығаратын боламыз, — дейді.
Жиын соңында тараптар ел игілігі үшін жасалған келісімшартқа отырғандарына өздерінің ризашылықтарын айтып тарқасты.
Нұрдәулет КӘКІШЕВ, «Семей таңы»
