Төртінші маусым – ел тарихындағы ерекше күн. 1992 жылғы маусымның 4-де тәуелсіз Қазақстанның жаңа мемлекеттік рәміздері алғаш рет бекітілді. Бұл күн ел тарихында жаңа мемлекеттік рәміздер күні ретінде мәңгі есте сақталады. Мемлекеттік рәміздер — мемлекеттің мызғымас негіздерінің бірі. Мемлекеттік Ту, Мемлекеттік Елтаңба және Мемлекеттік Әнұран мемлекеттің негізгі рәміздері саналады.
Рәміздер күніне орай қаламызда велошеру ұйымдастырылды. Шеруді «Жас Отан» жастар қанаты мен Семей қалалық дене шынықтыру және спорт бөлімі ұйымдастырды. Шараға 80-нен астам велосипедшілер қатысты.
Мерекеге арналған шара Әуезов алаңынан бастау алды. Алғаш сөз алған дене шынықтыру және спорт бөлімінің басшысы Мұрат Құржықаев атаулы күннің тарихына тоқталып өтті.
{jcomments on}- Төртінші маусым – Қазақстан Республикасының Мемлекеттік рәміздерінің күні. Дәл осы мерекеге орай қаламызда сан түрлі шаралар ұйымдастырылып жатыр. Соның бірі, өздеріңіз қатысып отырған велошеру. Барлық қатысушыларға зор денсаулық, сәттілік тілеймін. Жалынды жастарымыз әрдайым осындай спорттық шараларға қатысып, салауатты өмір салтын ұстанса, дені сау ұрпақ тәрбиелей аламыз, — деп жылы лебізін білдірді.
Ұйымдастырушылардың пікірінше, шараны өткізудегі басты мақсаты – бұқаралық спортты насихаттау, велоспорттың дамуына жол ашу, жас және талапты спортшыларды анықтау. Бұл бастаманы қала жастары да қолдап, шеруге қатысып отыр. Велошерудің өтетіндігін әлеуметтік желілерден біліп, арнайы қатысуға келгендердің бірі – Данияр Ахметов.
— Мемлекеттік рәміздер күні – мәртебесі биік мереке. Қолға алынып отыр-ған шара патриоттық тұрғыдан жастардың тәрбиесіне айтарлықтай үлес қосады деп ойлаймын. Әлеуметтік желілерден бұл шара жайлы біле салысымен, өзім де шеруге шығуды жөн санадым. Жастайымнан велоспортқа ден қойдым. Спорттың осы түрі денсаулықты нығайту үшін ғана пайдалы емес, сонымен қоса, экологиялық жағынан ең зиянсыз көлік түрі. Сондықтан, жастарымыздың велосипедке деген қызығушылықтары арта түссе, нұр үстіне нұр болар еді, -дейді өз ойымен бөліскен Данияр Ахметов.
Әуезов алаңынан бастау алған велошеру Әріп Тәңірбергенов көшесін бойлай, ескі көпір арқылы жағажайға дейін жалғасты. Бұл жерде велошабандоздарды қаладағы өнер ұжымдары ұйымдастырған концерттік бағдарлама күтіп тұрды. Әрмен қарай велошеруге қатысушылар Полковничий аралына табан тіреді.
Әйгерім СӘРСЕНҒАЛИ,
«Семей таңы»
