Сабантой — түркі халықтарында (татар, башқұрт, ішінара қазақтарда) тойланатын мейрам. Сабантой мейрамы 90-жылдардан бастап Татарстан Республикасында мемлекеттік деңгейде аталып өтіледі. Бұл күні татар ұлты ұлттық дәстүрлерін ұлықтайтын күн. Ұлттық тағамдар әзірленіп, ұмытылып бара жатқан ұлттық дәстүрлерді еске түсіріп, театрландырылған қойылымдар көрсетеді.
Сондықтан болар, Сабантой – татар халқының шоқтығы биік мерекесі. Мереке біздің қалада жыл сайын кең көлемде аталып өтіледі.
Биыл Түйемойнақ аралында ұйымдастырылған мерекеге шаһарымыздағы барлық ұлт пен ұлыс өкілдері, қалалық Достық үйінің 12 этномәдени бірлестігі белсене қатысты. Сондай–ақ, қала басшылығы қолдау танытып, облыстан Шығыс Қазақстан облысы Қазақстан халқы Ассамблеясы хатшылығының меңгерушісі Еркінбек Аязбаев Сабантой мерекесінің құрметті қонағы болды.
Салтанатты жиында қала әкімінің орынбасары Зәуреш Исабаева қала басшысы Айбек Кәрімовтің атынан құттықтау сөзін арнады. «Сабантой – татар халқының ұлттық мейрамы емес, Қазақстанды мекен еткен барлық ұлттардың мейрамы. Достықтың ұясындай болған Семей қаласындағы барлық этностар ырыс – ынтымақтың, береке – бірліктің бастауын көрсетіп отыр. Барлығы да Сабантой мерекесіне бір кісідей атсалысып жүр. Бұл — бір мақсат жолында ортақ мүддені ұстана отырып, бір болашаққа ұмтылған халықтың көрінісі. Әрдайым бірлігіміз бекем болсын,- деп Зәуреш Рамазанқызы жылы лебізін білдірді.
Сонымен қатар, жиында ШҚО Қазақстан халқы Ассамблеясы хатшылығының меңгерушісі Еркінбек Аязбаев ШҚО халықтар Ассамблеясының төрағасы, облыс әкімі Бердібек Сапарбаевтың да ыстық ықыласын жеткізді. «Сабантой — еңбек мерекесі. Қазақстан халқын бір орталыққа біріктіріп, тұрақты қоғам құруға бағытталған іс-шаралардың бірі»,- деген ол Қазақстан халқы Ассамблеясының 2020 жылға дейінгі даму жоспарына енген Сабантой мейрамы жыл сайын үзіліссіз атап өтілетін мереке екендігін де айтып өтті.
{jcomments on}Биылғы жылдың басты ерекшелігі – тұңғыш рет «Сабантой-2014» туы көтерілді. Ту көтеру құрметі татар этномәдени орталығының құрылуына себепкер болған Ғазиз Ахмеров пен көркем гимнастикадан Қазақстан чемпионы Камила Сафинаға бұйырды.
Мерекеде татар халқының дастарханы жайылып, ұлттық өнерлері көрсетілді, қолөнер көрмесі ұйымдастырылды. Аталған іс – шаралардан Достық үйінің өзге этно-мәдени бірлестіктері де қалыс қалмады. Мәселен, мерекеге арнайы өздерінің қолөнер көрмелерін ұйымдастырған өзбек бірлестігінің төрайымы Роза Михайловна: «Баршамызға ортақ мейрам. Біз әрқашан бірлік танытып, бір-біріміздің мәдениетімізге құрметпен қарауымыз керек. «Мәңгілік Ел» болуды қалаған халық бір жеңнен қол, бір жағадан бас шығара отырып, ортақ мақсат жолында бірігеді»,- деді.
Рашида Хасанова сабантой — Семейдегі түрлі ұлттардың өзара татулығы һәм достығының дәнекерлеушісі іспеттес екендігін айтады.
— Сабантойдың басты мақсаты – халықтар достығын арттыру. Сондай-ақ, маңыздылығы жоғары мейрам тіршілік бастауы, егін науқаны аяқталған шақта өткізілетіндіктен, молшылық пен жаңа өмір жаршысы болмақ. Біз, татарлар, Сабантойдың осылай атап өтілуіне шексіз ризамыз.- деп, риясыз көңілінен шыққан лебізін білдірді.
Сабантойдың маңызы мен мақсатына тоқталған татар орталығының төрайымы Камила Исмаилова жиылған қауымға алғысын айтып, татулығымыз бен бірлігіміз жасай берсін деген тілек тіледі. Сонымен бірге, құтты мекенге айналған Қазақстанда әр этнос өкілдері үшін барлық жағдай жасалғандығына да тоқталды.
Шара мерекелік концертпен жалғасып, жастар жағы алтыбақан теуіп, қол күрестіріп, арқан тартысып, спорттық ойындарға ұласты.
Әйгерім СӘРСЕНҒАЛИ,
«Семей таңы»
