Семей қаласының тумасы, Қазақстан Журналистер одағының мүшесі, «Алтын жұлдыз» сыйлығының иегері, бард әнші Нариман Сұлтанбеков қаламыздың оқу орындары студенттерімен кездесті. Абай атындағы кітапханада болған жиын «Жерлестер форумының» аясында ұйымдастырылды. Кездесу барысында болашақ мамандар Нариман Мұратұлына өздерін қызықтырған сауалдарын қойып, сұхбаттасуға мүмкіндік алды.
Кездесу барысында қойылған сұрақтың ең біріншісі, әлбетте, Нариман Сұлтанбековтың балалық шағы, студенттік өмірі мен еңбек жолының қалай басталғаны туралы болды. Жерлесіміз қаламыздағы 35-ші мектепте оқығанын, оны тәмамдағаннан кейін Семей педагогикалық институтында филолог мамандығы бойынша білім алғанын айтып, оқушы және студент кезіндегі достарын еске алды. Еңбек жолын ол 1996 жылы сол кездегі СТР арнасында «Ход конем» бағдарламасының жүргізушісі болып бастаған екен. Сол жылы аталмыш телеөнім Қазақстан Республикасының телевизиялық «Алтын жұлдыз» сыйлығының иегері атанған. Одан кейін еліміздің бірқатар аймақтарында телеарналарда авторлық бағдарламалар түсіріп, жетекшілік қызмет істеген көрінеді. Қазіргі таңда Астана қаласында «Тұран ТВ» телекомпаниясының директорының міндетін атқаруда. Өзінің осы уақытқа дейінгі өмірбаяны мен еңбек жолы жайлы сұраққа Нариман Мұратұлы осылай жауап берді.
Телеарна саласындағы біліктілігі өз алдына, жерлесімізідің музыкатанушылығы, бард әншілік өнері тағы бар. Өзімен бірге гитарасын ала келген Нариман Сұлтанбеков көбіне оптимистік мәнерде жазылған шығармаларын орындап беріп, жиналғандардың көңілдерін көтеріп отыруды да ұмытпады. Осыған орай студенттер тарапынан музыкаға құштарлығы неше жасынан бастап оянғаны туралы сауал қойылды. Жерлесіміз гитарада ойнауды бесінші сыныпта жүргенде үйрене бастағанын тілге тиек ете отырып, өнерге деген шынайы сүйіспеншілігі жоғарғы сыныптарда оянғанын жеткізді. Өлең жазып, авторлық әндерді орындау да осы кездерде басталған көрінеді. Жерлесімізден шығармашылығы жайлы осындай жауап естігеннен кейін студенттер, Нариман Мұратұлына шығарма жазуға әдетте не түрткі болатыны, не шабыттандыратыны жайлы сауал қойды. Ол оған былайша жауап берді:
{jcomments on}- Мен айналамдағы дүниенің бәрінен шабыт аламын. Көбіне қуанышты жайттардың куәсі болғанда немесе жақсы адамдармен кездескенде. Тіпті, ауа-райы, табиғаттың сұлулығы, кездейсоқ жолыққан бойжеткендердің ажарлы келбеттері, көз қуантып, көңілге қуаныш ұялататын дүниенің барлығы әдемі өлең жолдарымен әннің тууына себепкер болуы мүмкін.
Жетістікке жетудің құпиясы жайлы сұраққа Нариман Сұлтанбеков шынайылықты сақтап, тапсырылған әр жұмысты жауапкершілікпен орындауға дағдыланып, еңбекқор болу жеткілікті екенін атап өтті.
Семейге келгендегі, оны ұзақ жылдардан кейін көргендегі алған алғашқы әсері туралы жерлесіміз былай деді:
— Біздің студент кезімізде қала мұндай емес еді. Әлбетте, тоқсаныншы жылдардағы тоқыраудың салқыны шаһарымызды айналып өтпеді. Қаланың шет аумақтарын былай қойып, жол сапасының нашарлығынан ол кезде орталық көшелермен жүріп-тұрудың өзі қиын болатын. Қазір бәрі өзгерген, туған қаламның көркейіп келе жатқанын көзіммен көрдім. Таза көшелер мен әдемі саябақтар, менің студенттік шағымдағыға қарағанда сапалы жолдарды, ең бастысы, жүздері нұр шашып тұратын жерлестерімді көріп бір жасап қалдым.
Нариман Сұлтанбеков жиналғандардың сұрақтарына жауап беру барысында жанұясы, жұбайы Ғалия мен екі баласы жайлы да айтып берді. Сондай-ақ, жиын соңында емін-еркін сұрақ қойып, әңгімелескен студенттер мен кітапхана қызметкерлеріне, «Жерлестер форумына» арнайы шақырып, осындай кездесу өткізуге мүмкіндік сыйлаған облыс басшылығына алғысын білдірді. Жүздесу аяқталған соң жиналғандар Нариман Мұратұлының қолтаңбасын алып, онымен бірге естелік суретке түсіп, ашық-жарқын сөйлесіп, сұхбаттасқаны үшін ризашылықтарын жеткізді.
Мирас ҚҰСАЙЫН, «Семей таңы»
