Өткен бейсенбі күні Семей қаласының әкімі Айбек Кәрімовтың төрағалығымен кәсіпкерлермен бірқатар түйткілді мәселелерді талқылауға арналған кездесу өтті . Жиын қорытындысы бойынша бизнес өкілдерінің пікірлерін білу мақсатымен кәсіпкерлік бөлімінің мамандары бірнеше кәсіпорында болып, олардың жұмыс жағдайымен танысты. Өз кезегінде кәсіпкерлер қала әкімімен болған кездесу жайлы ойларын айтты.
Ең бірінші кезекте кәсіпкерлік бөлімінің мамандары «УК Юнис» ЖШС шұлық-трикотаж фабрикасына барды. Нарықта 1992 жылдан бері жұмыс істеп келе жатқан кәсіпорынды Юрий Келенцев басқарады. Өндірісі шағын болса да осы уақыт аралығында тұрақты тұтынушыларын тапқан серіктестік қазіргі таңда Қорғаныс министрлігімен және Ұлттық гвардиямен тығыз жұмыс істейді. Кәсіпорын директорының айтуынша, өндіріс көлемінің шағындығына қарамастан өнеркәсіп орны өзінің жұмысшылары мен қала алдындағы міндеттемелерін толық атқаруға дайын көрінеді.
— Кездесу барысында біз бірқатар маңызды мәселелерді талқыладық. Оның ішінде салық төлеу режимі, көшелердің тазалық жағдайы және бизнестің әлеуметтік жауапкершілігі сияқты мәселелер де бар. Өндірісіміз шағын болса да, біз өзіміздің міндеттемелерімізді толық атқарып жатырмыз: салықтарды уақытында төлеп тұрамыз, биыл жалақыны он пайызға арттыруды жоспарлап отырмыз. Көшелердің тазалық жағдайына келетін болсақ, біз кәсіпорынымызға жақын жатқан көшенің жөндеу жұмыстарына мүмкіндігіміздің жеткенінше қаржылай көмек беруге дайынбыз, — дейді Юрий Келенцев.
Санитарлық талаптарды күшейту туралы ұсынысты жеке кәсіпкер, «Жастар» кафесінің директоры Надежда Шевченко да қолдайды. Оның ойынша, көп жағдайда кәсіпкерлер өздерінің кәсіпорындарының маңайындағы аумақтардың тазалығына мән бере бермейтін көрінеді.
{jcomments on}- Өкінішке орай, біздің кафенің жанына да қалдықтар тасталып жатады. Бірақ, біз бұл жаман құбылыспен күресіп келеміз. Меніңше, қала мен бизнес үшін маңызы бар мәселелер талқыланатын мұндай кездесулерді өткізіп тұру керек. Осындай жиындарда өзекті мәселелер жайлы ашық айтып, олардың барлық тараптар үшін, қала үшін де, кәсіпкерлер үшін де тиімді, оңтайлы шешімін тауып, өзара пікір алмасуға мүмкіндік туады, — дейді Надежда Шевченко. Кәсіпкерлік бөлімінің мамандары «Васкания» фирмасында да болып қайтты. Бұл кәсіпорынның директоры Ирина Булутханованың айтуынша, кездесуде талқыланған маңызды тақырыптардың бірі салық салу жүйесіне қатысты мәселелер болған көрінеді.
— Мен мұндай кездесулердің өткізіліп тұратынына қуаныштымын. Біз үшін төлеген салықтарымыздың қайда, қандай мақсаттарға жұмсалып жатқанын, қаламызды абаттандыру бойынша қандай шаруалар жүзеге асырылып жатқанын, мемлекет пен жеке кәсіпкерліктің әріптестігінің қандай механизмдері барын білу өте үлкен маңызға ие. Менің ойымша, кездесу барысында қозғалған салық салу жүйесіне қатысты мәселенің маңызы өте зор. Бәрі өзара тығыз байланысты: кәсіпкерлердің салықтарды уақытылы әрі бекітілген мөлшерде төлеп тұрулары мемлекеттік қолдау мен несиелендірудің кепілі, ал ол өз кезегінде бизнесіміздің дамуына көп ықпалын тигізеді. Ал, кәсіпкерліктің тұрақты дамуы қала бюджетінің толықтығын, қала тұрғындарына әлеуметтік көмек беру мен ертеңгі күнге деген сенімділікті қамтамасыз етеді, — деп атап өтті Ирина Булутханова.
Өткізілген кездесудің маңыздылығы басым. Себебі, мұндай жиындарды өткізу екі институттың тығыз байланысын нығайта түсумен қатар, шешімі қоғамға пайдалы, бірқатар өзекті мәселелерге назар аударуға мүмкіндік береді, — деп санайды кәсіпкерлер.
Мирас ҚҰСАЙЫН, «Семей таңы»
