Орталық алаңда қалалық білім бөлімінің ұйымдастыруымен «Жас түлек-2014» атты биылғы мектеп түлектерінің мерекелік кеші өтті. Кеш барысында «Алтын белгі», Үздік аттестат иегерлерін құттықтау рәсімі болды.
Түлектерге жылы лебізін білдіру үшін мерекелік шараға қала әкімі Айбек Кәрімов арнайы қатысты. Ресми ақпараттарға сүйенсек, биылғы 2013-2014 оқу жылында Семей қаласы бойынша 2 мыңға жуық оқушы мектеп бітірген. Қаладағы 58 мектептен 1375 мектеп бітіруші түлектер, ал, қалаға қарасты ауылдардың мектептерінен 85 түлек 2-8 маусым күндері аралығында өткен ҰБТ-ға қатысқан. ҰБТ нәтижесі бойынша қаладағы орташа балл 78-ді құраған. Бұл көрсеткіш өткен жылдармен салыстырғанда біршама артқан (2013 жылы – 76 балл, 2012 жылы – 73 балл). Соның ішінде Экономикалық лицей (97,1 балл), № 6 гимназия (95,3 балл), № 37 мектеп-гимназия (95 балл), № 41 орта мектеп (89,1 балл) сияқты бірқатар мектептер жоғары көрсеткішке ие бол-ған. Сонымен қатар, биылғы оқу жылында 19 түлек «Алтын белгі» аттестатынан үміткер болып, үкілеген үмітті ақтаса, 11 түлек “үздік аттестатқа” иелік еткен. 220 түлек 100 баллдан жоғары балл алса, халықаралық, республикалық деңгейдегі түрлі зияткерлік олимпиада және сайыстарда өздерінің білімділігін танытқан 31 түлек жоғары оқу орындарының грантына ие болған.
{jcomments on}Мерекелік шарада алғашқы болып сөз алған қала әкімі Айбек Кәрімов:
— Бүгінгі салтанатты сәт әрқайсымызға ұмытылмастай әсер, тартымды көңіл-күй сыйлап тұр. Кешегі балапандай балдырғандар бүгінде жас түлекке айналды. Білім бақшасында бәйшешектей бүр жарып, шынардай бой түзеді. Енді олар өмірдің әр қиырына көз тігіп, өздері таңдаған жолға аттанбақ. Сәт сапар тілейміз,-дей келе, Айбек Мүталапхан-ұлы қала мектептерінің 156 түлегі Ресей Федерациясындағы жоғары оқу орындарының грантына ие болғанын зор мақтанышпен атап өтті. – Олардың болашақта Еуразиялық экономикалық кеңістігінде бәсекеге қабілетті маман бола алатындығына сеніміміз мол. Бұл шәкірттерді шыңдау жолындағы ұстаздар қауымының ұшан-теңіз еңбегінің жемісі, ата-аналардың мектеп өмірімен тығыз байланысының нәтижесі деп білеміз.
Жалынды жастардың жетістігін сөз еткен қала әкімі түлектерге деген өзінің жылы лебізін де білдірді.
— «Ұрпағы білімді елдің болашағы зор» деген дана халқымыз. Біздің мемлекетімізде терең білім алуға, білікті маман атануға, өз кәсібіңнің үздігі болуға толық жағдай жасалған. Елбасымыздың алдыға қойып отырған ұзақ мерзімді стратегиясын, «Мәңгілік Ел» идеясын жүзеге асыруда сіздерге түсер салмақ аз емес. Ел болашағының баянды болуы сіздердің білімдеріңіз бен табысты еңбектеріңізге тікелей қатысы бар екенін әр кез естеріңізде сақтауларыңызды сұраймын. Бүгінгі түлек – ертеңгі маман. Ер сенімін, ел үмітін сақтаймын деген талаптарыңызға нұр жауып, қадамдарыңыз тек сәттілікке ұлассын. Мектеп қабырғасынан қанат қаққан қуаныштарыңыз құтты болсын! – деді қала басшысы жас түлектерді құттықтау кезінде.
Сөз соңында қала әкімі мектепте озат оқушы болып, ерекше білімімен айқындалған 30 түлекке «Алтын белгі» төсбелгісі мен үздік аттестаттарды салтанатты түрде табыс етті.
№ 37 мектеп-гимназияның түлектері Айым мен Гүлім Балталиновалар — «Алтын белгіге» бітірген түлектердің қатарында. Егіз қыздардың екеуі де ҰБТ-дан жоғары балл жинап (116 және 118 балл), бүгінде екеуі бірдей Алматы қаласындағы КИМЭП университетінің грантына ие болған. Сұхбат барысында Айым мен Гүлім ата-аналары мен ұстаздарының үмітін ақтау үшін бар күш-жігерлерін салатынын айтып, барша қатарластарына сәттілік тіледі.
Салтанатты шара барысында мектеп түлектерінің атынан құттықтау сөз сөйлеген Ө.Жолдасбеков атындағы математика, механикадан оқушылардың зерттеу жұмыстарының халықаралық ғылыми жарыстың жүлдегері (Алматы қ.), ІІІ дәрежелі диплом мен қола медалінің иегері Ақсұлтан Қалиев пен “үздік аттестат” иегері Камила Исабаева қанаттыға қақтырмай, тұмсықтыға шоқыттырмай, мәпелеп өсірген ата-аналары мен 11 жыл бойы білім нәрімен сусындатқан ұстаздарына шексіз алғыстарын айтты.
Өз кезегінде сөз алған белгілі актер, Қазақстанның халық әртісі Бекен Имаханов ақсақал:
— Мектеп бітіріп, үлкен өмірге басқан қадамдарың құтты болсын! Қай жерде жүрсеңдер де өздеріңді тек жақсы жақтарыңнан көрсетіңдер. Тек биіктен көріне беріңдер. Ақ жол тілеймін! – деп түлектерге ата жолымен ақ батасын берді.
Алтын ұяларынан қанат қаққан жастардың вальс биі көпшілікті ерекше әсерге бөледі. Балалар мен жастар шығармашылық сарайының тәрбиеленушілері, «Жас қанат» және «Жас жұлдыз» балалар орталығы мен мектепке дейінгі бірқатар мекемелер тәрбиеленушілерінің қатысуымен театрландырылған көріністер көрсетілді. Әуезді әндер шырқалып, көңілді биге де кезек берілді. Жас түлектерге арналған салтанатты кеш мерекелік отшашумен аяқталды.
Нұрдәулет КӘКІШЕВ,
«Семей таңы»
