Терлікбаев Әділғажы Мұхаметқалиұлы 1919 жылы бүгінгі Науалы ауылының төменгі жағында болған ”Тегісшілдік’’ атты шағын қыстақта дүниеге келген. Әділғажы ақсақал үйдің кенжесі екен. Алдында бес әпкесі, бір ағасы болған. Сүт кенжесін қолына алып, барша жұрттан сүйінші сұраған әкесін сәби Әділғажы қырық күндігінен шықпай жатып, әулетінің қабырғасын қайыстырып қара жер құшағына алды. Ә.Терлікбаев 14 жасқа толғанда 1932-1933 жылдардағы қазақ жеріндегі қолдан жасалған ашаршылық кезінде Қытай асып кетеді. Бұғанасы қатпаған бала жат жерде, бейтаныс елдің ортасында ер жетті. Жігіттік шағында әскер қатарына алынып, борышын өтеген. Шекара ашылып, ата қонысқа қайтуға мүмкіндік туғанда 1955 жылы туған өлкеге келген. Туған жердің күні де, түні де ыстық екендігін жете түсінген ақсақал елде зейнет жасына дейін мал бағып, шопандық еткен. От анасы Қайшыкен апа екеуі шаңырақ көтеріп, 10 бала тәрбиелеп өсірген. Балаларының барлығы дерлік білім алып, өз алдарына отау құрған. Бүгінде еліміздің әр аймағында сан түрлі салада қызмет етіп жүр. Әділғажы ата бүгінгі күні немере, шөберелерінің қызығын көріп отыр. Қазіргі таңда Үржар ауылында кенже кызының қолында күтім көріп отырған ақсал ауыл тынысынан хабардар. Аудан орталығында болып жатқан өзгерістер мен жаңалықтарды қалт жібермейтіні тағы бар.
{jcomments on}- Ауданымызда, елімізде болып жатқан әрбір жағдай мемлекетіміздің даму келешегіне әсер етеді, яғни, Отанымыз үшін маңызды. Отан деген – өмірде бар жақсылық, бақыт, байлық. Әр адам Отанында ғана өсіп-өркендейді, гүлденеді, елінің мүддесін ұстанады. Сондықтан, қасиетті Атамекенді қадірлеп, Тәуелсіздігімізді бағалап, әр іс — әрекеттеріңді елдің дамуына бағыттаңдар,- деп ұрпақтарына өсиет айтып отырады бүгінде Әділғажы ақсақал.
Көнекөз қария өзінің құрдасы, 95 жылдық тарихы бар «Семей таңы» газетін немерелері оқып беретіндігін айтады. Ақсақал елімізде тыныштық, бейбітшілік болып, Тәуелсіздігіміз мәңгі жасасын деген тілегін білдіре отырып, газеттің халыққа қазмет қылып, ел бірлігі мен ынтымағына қосар үлесі көп болсын деген батасын берді.
Бауыржан ЖАҚЫП,
“Семей таңы”
