Республикалық «Coca-cola Былғары доп» турнирінің жабылу салтанаты өтті. Дәстүрлі түрде ұйымдастырылып келе жатқан жарысқа биыл еліміздің 14 облысы мен Астана және Алматы қалаларынан он алты команда қатысты. Жабылу салтанатында жеңімпаздар мен жүлдегерлер марапатталды.
Жыл сайын өткізілетін Республикалық «Coca-cola Былғары доп» турнирінің мақсаты – футболды халық арасында кеңінен насихаттау, жас аяқдопшыларды даярлау. Биыл аталмыш турнирге еліміздің 5000 мектебінен жиыны 350 000 мыңдай оқушы қатысқан көрінеді. Жарыстың байырғы серіктесі әрі басты демеушісі доп додасының финалдық бөлігіне қатысушылардың барлық шығынын өз мойнына алумен қатар, жыл сайын жеңімпаздарға арнап тосын сый жасап отырады. Мәселен, биылғы жылғы үлкен жастағы футболшылар тобында өткен турнирдің жеңімпаздарына Бразилияда өтіп жатқан әлем біріншілігінің ашылу салтанатына жолдамаларды тарту еткен көрінеді. Оның үстіне, биылғы «Coca-cola Былғары доп» жарысы осы мундиальге арналып отыр.
{jcomments on}Жарыстың финалдық ойыны «Спартак» стадионында ойналды. Алматы қаласы мен Қарағанды облысының командалары бақ сынасты. Ойынның негізгі бөлігін тең нәтижемен аяқтаған жас футболшылар жеңімпазды матчтан кейінгі пенальти арқылы анықтады. Қарағандылық команда Алматылық аяқдопшылардан басым түсті.
Финалдық кездесуден кейін өткізілген салтанатты жабылу рәсімінде сөз сөйлеген Семей қалалық дене шынықтыру және спорт бөлімінің басшысы Мұрат Құржықаев мұндай турнирдің өткізілуі өте үлкен маңызға ие екенін тілге тиек етіп, қатысушылардың бәріне мықты футболшы болып шығуларына тілектестік білдірді. Сондай-ақ, Қазақстан футбол федерациясының балалар және жасөспірімдер футболы бөлімінің жетекші маманы Игорь Утробин де өзінің жылы лебізін жеткізіп, жас аяқдопшыларды құттықтады. Жоғарыда айтылғандай, жарыс қорытындысы бойынша бірінші орында Қарағанды облысының командасы, екінші орынды Алматы қаласының командасы иеленді. Ал, үшінші орын Оңтүстік Қазақстан облысынан келген жас аяқдопшыларға бұйырды. Барлығына бас демеушінің атынан бағалы сыйлықтар мен грамоталар табысталды. Осы орайда, айта кетерлік бір жайт, алдыңғы болған жарыста Шығыс Қазақстан облысының командасы 8-ші орынға табан тіресе, осы жолғы турнирдің нәтижесі бойынша 6-шы орын алған көрінеді. Бұл да болса, біздің өңірдегі футболдың біртіндеп дамып келе жатқанының белгісі деуге тұрарлықтай.
Турнир барысында номинация бойынша үздік ойыншылар анықталған болатын. «Ең үздік қақпашы» деген атқа Алматы қаласының командасынан Асылжан Керім лайықты деп бағаланды. Оңтүстік Қазақстан облысы командасының ойыншысы Жәмшібек Юсантаев «ең үздік қорғаушы» атанса, Жәмшібектің командаласы Мұратжан Долмотов «ең үздік шабуылшы» деген атты иеленді. Қарағандылық Сағымжан Оспанов «ең үздік жартылай қорғау-шы», осы өңірдің тағы бір өкілі Жәнібек Ислямов «ең үздік шабуылшы» деп танылды. Турнир бойы тамаша ойын өрнегін көрсетіп, талантымен таныла білген Алматылық Ислам Сәбеков «ең үздік ойыншы» деген атаққа қол жеткізді. Салтанатты жиында осы аталған жас футболшылардың барлығы бағалы сыйлықтармен және грамоталармен марапатталды.
Мирас ҚҰСАЙЫН,
«Семей таңы»
