Астана күні қарсаңында Қазақстан Республикасы Ұлттық ұланның 5511 әскери бөлімінде сардарлар мен сарбаздардың жазғы оқу-жаттығуының ашылу салтанаты болды.
Жазғы оқу-жаттығудың ашылу салтанатына Семей горнизоны бойынша ҚР Ұлттық Ұланының ардагерлері кеңесінің төрағасы, зейнеткер полковник Дәулет Алпаров бастаған әскери саланың ардагерлері, жергілікті билік өкілдері мен әлеуметтік және мәдениет саласының қызметкерлері, сардарлар мен сарбаздар қатысты.
Салтанатты шара барысында түрлі жарыстарда жетістікке жетіп, жұмыста да жақсы нәтиже көрсетіп жүрген бөлімшелер мен бірқатар қызметкерлер арнайы грамоталармен марапатталды.
Сап түзеген сарбаздар өртке қарсы дайындықтарын көрсетті.
— Жазғы оқу-жаттығу қарбаласқа толы болады. Өйткені, онда физикалық жаттығулармен қатар, қауіпсіздік шаралары және медициналық алғашқы көмек көрсету бойынша жаттығулар өтеді. Сонымен қатар, оқу-жаттығу аясында құқықтық, саяси, идеологиялық бағыттағы сабақтар да өткізіледі. Біз, ардагерлер, Отан қорғаушылардың қарым-қабілетін бақылау үшін және оларға ақыл-кеңесімізді айту үшін осында арнайы келіп отырған жайымыз бар, — дейді Дәулет Алпаров.
Оқу-жаттығу аясында қалалық ішкі саясат бөлімінің ақпараттық-насихат тобы сарбаздар мен сардарларға «ҚР Қарулы күштерінің Жоғары Бас қолбасшысы» тақырыбында идеологиялық сабақ өткізді. Идеологиялық сабақ барысында сөз алған аталмыш топтың мүшелері, қалалық ішкі саясат бөлімінің ақпараттық сектор меңгерушісі Роллан Кемербаев пен ҚазИГЗУ-дегі «Қазақстан жолы» тәрбие-білім орталығының директоры Аман Рахметуллин әскерилерді жаңа маусымдағы оқу-жаттығудың ашылуымен және алдағы Астана күні мерекесімен құттықтап, еңбектеріне жеміс тіледі.
{jcomments on}- Біз үшін 6 шілде күні қос бірдей мереке. Ол елордамыз Астана қаласының және Елбасы Нұрсұлтан Назарбаевтың туған күні. Әрине, Мемлекет басшысының туған күнін атап өтуді құп көрмейтіндер де болуы мүмкін. Алайда, мемлекеттің Тұңғыш Президентінің дүниеге келген күнін атап өту әлем елдерінің тәжірибесінде бұрыннан бері кездеседі, — деген дербес зейнеткер, ақпараттық-насихат тобының лекторы Серік Төлеуғалиев «ҚР Қарулы күштерінің Жоғары Бас қолбасшысы» тақырыбына тереңірек тоқталып, Елбасының «Қазақстан жолы — 2050: Бір мақсат, бір мүдде, бір болашақ» атты биылғы Жолдауы туралы да айтып өтті.
Қазақстан Республикасы Ұлттық ұланның 5511 әскери бөлімі командирінің әлеуметтік-құқық жұмыстары бойынша орынбасары Ерлік Ықыласовпен де сұхбаттасудың сәті түсті.
— Қала тұрғындары мен қала қонақтары өмірінің қауіпсіздігін сақтау және күнделікті өмірде кездесетін тұрмыстық қауіпсіздікті сақтау мақсатында ұйымдастырылатын оқу-жаттығулар, Елбасымыз, ҚР Қарулы күштерінің Жоғары Бас Қолбасшысы Н.Ә.Назарбаев туралы ақпараттық сабақтар сардарлар мен сарбаздар арасында жыл сайын дәстүрлі түрде өткізіліп тұрады. Енді оқу-жаттығуға күнделікті 2 сағат уақыт бөлінетін болады, — дейді Ерлік Ықыласов.
Әскери сала мамандарының айтуынша, жазғы оқу-жаттығулары бойынша жыл соңында сардарлар мен сарбаздар арнайы сынақ тапсыратын көрінеді. Ал, қаңтар айынан бастап қысқы оқу-жаттығулар басталатынын, ол кездегі жаттығулардың қазіргіден біршама айырмашылығы болатындығын айтады әскерилер. Демек, сарбаздар сапындағы жігерлі азаматтар жылдың барлық мезгілдерінде де Отанымызды қорғауға сақадай сай деуге негіз бар.
Нұрдәулет КӘКІШЕВ, «Семей таңы»
