ЗҮЛЖАМАЛ АНА
Зүлжамал Құниярова 1919 жылы дүниеге келген. Тұрмыс тауқыметін жастай тартып, бұғанасы бекімей жатып қабырға қайыстырарлық еңбекке ерте араласқан кейіпкеріміз 1935 жылы Зейнелғаби Құниярұлы атты азаматқа тұрмысқа шығады. Алайда, жас жұбайлардың бақытты өмірі ұзаққа созылмаған. Ұлы Отан соғысы басталып, жұбайы Зейнелғаби алғашқылардың бірі болып, майданға аттанады. Бір жасқа толар толмас Клара есімді қызын бауырына басқан жас ана да ауылдағы жасы үлкен қариялар, жас балалар, өзі сияқты әйел адамдармен бірге таңның атысынан, күннің батысына дейін «майдан үшін, жеңіс үшін!» деген ұранмен тылда тынбай еңбек етеді.
— Ол кезде демалыс деген болмайды. Қиындыққа үйренген соң, шаршау дегенді естен шығарады екенсің, — дейді Зүлжамал апа өткен күндерді еске алып.
Міне, осындай қиыншылық пен ауыртпашылықты еңбекпен айырбастап жүргенде 1943 жылы жұбайы Зейнелғабидың Ленинград майданындағы ұрыста қаза болғаны туралы «қара қағаз» келеді.
{jcomments on}Қалған ғұмырын отағасының көзіндей болған Кларасын оқытып, өсіруге арнаған ана ұзақ жылдар «Жаңа тірлік» колхозы мен «Кендірлік» совхозында бақташы, сауыншы болып жұмыс істеп, зейнеткерлікке шыққан. 1977 жылы «Еңбек ардагері», 1995 және 2005 жылдары ҰОС мерекелік медальдармен марапатталған. Бірнеше мәрте Қара Ертіс селолық Кеңесіне депутат болып сайланып, оқу-ағарту, мәдениет, денсаулық сақтау, сауда салалары бойынша қоғамдық жұмыстарға белсене араласқан. Еңбекқор жанның еңбегі елеусіз қалмаған. 1992 жылы Кеңестер Одағының барлық аймақтарын тегін аралауға құқық беретін куәлік алған екен. Алайда, заманның өзгергеніне байланысты Зүлжамал әже куәлікті пайдалана алмаған көрінеді.
Қызы Клара Зайсан қаласындағы орталық ауруханада ұзақ жылдар мейірбике болып қызмет етіп, зейнеткерлікке шықты. Бүгінде кейуана қызы Клара мен оның жұбайы Меңғалидың қолында. Ұлағатты ұрпақ тәрбиелеген дария көңілді қария-ның деніне саулық, отбасына амандық тілейміз!
