29 тамыз күні ШҚО – да «Невада-Семей» қозғалысының 25 жылдығына арналған халықаралық дәрежедегі жиын өтеді деп күтілуде. Биылғы жылғы халықаралық жиын тікелей қозғалыстың 25 жылдығымен орайластырылуда. Халықаралық дәрежеде өтетін атаулы шараға, әлбетте, тың-ғылықты дайындық, тындырымды іс қажет. Осы ретте ШҚО әкімінің орынбасары Жақсылық Омардың, Семей қаласының әкімі Айбек Кәрімовтің қатысуымен іс – шараларға басымдық берілетін Семей және Курчатов қалаларының дайындықтарын пысықтау мақсатында Семей қаласы әкімдігінде жиын өтті.
Әкімдікте өткен жиында ШҚО Ішкі саясат басқармасының басшысы Ербол Нұрғалиев АҚШ, Жапония, Қытай, Италия, Израиль, Ресей сынды мемлекеттерден мәртебелі меймандар келеді деп күтіліп отырғанын атап өтті.
Сондай –ақ, әлемнің әр түкпірінен келетін мәртебелі меймандарды қарсы алудан бастап, өткізілетін жиындар, таныстырылымдар мен конференциялар төңіре-гіндегі жұмыстар талқыланды.
Мәлім болғандай, жиынға арнайы келген делегаттардың жұмысы Семей қаласындағы Абай ескерткішіне гүл шоғын қоюмен басталып, Семей қаласының облыстық тарихи – өлкетану музейінде, Семей өңірлік онкологиялық диспансерінде жалғасады деп күтілуде. Сонымен қатар, Семей қаласындағы Полковничий аралында бес мың адамның қатысуымен қозғалыстың 25 жылдығына арналған жиын, Абай атындағы театрда халықарылық конференция өтеді деп болжануда.
«Невада-Семей» қозғалысының 25 жылдығына арналған жиынға әлемнің әр түкпірінен отыздан астам журналистер келіп, атаулы шараның куәгерлері болады.
{jcomments on}1989 жылы қоғам қайраткері, ақын Олжас Сүлейменовтің жетекшілігімен «Невада-Семей» қозғалысы құрылып, халықтың қолдауына ие болып, Елбасы Н.Назарбаевтың Жарлығымен Семей сынақ полигоны жабылды.
Бүгінгі күні 29 тамыз Қазақстанның бастамасымен және БҰҰ Бас Ассамблеясы қабылдаған қарар негізінде ядролық сынақтарға қарсы халықаралық іс-қимыл күні болып жарияланды.
Ерзат ЖАНАТҰЛЫ,
«Семей таңы»
