Өткен аптада Аймауытов көшесінде орналасқан 147-ші үй тұрғындарының өтініштері бойынша қала әкімі Айбек Кәрімов кездесу өткізді. Аталған үй тұрғындары «Версток» өндірістік кооперативінің құрамына кіреді. Алайда, тұрғындар кооператив жұмысына қанағаттанбай отыр. Олардың айтуынша, кооператив тарапынан ешқандай жұмыстар атқарылмайды. Шаһар басшысымен болған кездесуде «Версток» өндірістік кооперативі төрағасының орынбасары Василий Себастья-нов мәселеге қатысты өз пікірін білдірді.
Тұрғындар шаһар басшысына бірден үйдегі негізгі мәселелерді айтудан бастады. Пәтер иелері баспаналарындағы кәріз құбыры бірнеше жыл бойы аппатты жағдайда тұрғанын, тазалағаннан еш пайда жоқ екенін айтып, құбырды ауыстыру қажеттігін сөз қылды.
— Бізде үш жыл болды кәріз құбыры апатты жағдайда. Құбырды бірнеше рет тазалаған да болатын. Алайда, одан еш нәтиже шыққан жоқ. Құбырды ауыстыру қажет. Ол үшін екі пәтердің еденін ашу керек. Алайда, оған пәтер иелері келіспей отыр, — дейді тұрғындардың бірі.
«Версток» өндірістік кооперативі төрағасының орынбасары Василий Себастьянов өз сөзінде кәріз құбыры бірнеше рет тазартылғанын, сондай –ақ, тұрғындардың қарызы бар екенін атап өтті. Осы ретте қала әкімі Айбек Кәрімов кооператив тарапынан мәселені шешуде тұрғындармен қанша рет жиын өткізілгенін сұрады. Алайда, тұрғындар ешқандай жиналыстардың болмағанынан қала басшысын хабардар етті.
Василий Себастьянов болса тұрғындармен жиын өткізу мүмкін емес екенін айтады. Кооператив басшылығының айтуынша, бүгінгі күні 48 пәтерлі төрт қабатты үйде тұрғындардың қарызы қордаланып қалған. Соған қарамастан тұрғындар «ешқандай жұмыс атқарылмайды» деп айыптайды екен. Алайда, кооператив тарапынан балалар алаңқайы жөнге келтіріліп, төрт қабатты тұрғын үйдің кәріз жүйесі тазартылған.
Мәселені байыппен тыңдаған қала әкімі Айбек Кәрімов тұрғындар кооператив жетекшісінің жұмысына қанағаттанбаған жағдайда өзара жиын өткізіп, жаңа төрағаны сайлауға құқылы екендіктерін айтты.
{jcomments on}- Барлықтарыңыз жиналып, жаңа төрағаны тағайындаңыздар. Мұның барлығы сіздердің жеке меншіктеріңіз, бұл мемлекет қорындағы тұрғын үй емес. Мұндай мәселеде бюджеттен қаражат бөлінбейді. Біз қазір нарықтық экономикада өмір сүрудеміз, — деген Айбек Мүталапханұлы, — Егер жөндеу жұмыстарын жүргізгілеріңіз келсе мемлекеттік терможаңғырту бағдарламасы арқылы өтініштеріңізді берулеріңізге болады. Сол уақытта ғана біз ұзақ мерзімге қаражат бөлеміз. Ал, егер үйлеріңізде әлеуметтік жағынан қорғалмаған тұрғындар болса мемлекет тарапынан жеңілдіктер болады. Осының барлығын өздеріңіз ұйымдастырыңыздар. Дұрыс басшылық болмаса бұл мәселелер осылай жалғаса береді, — деді.
Кездесу соңында шаһар басшысы қалалық тұрғын үй инспекциясының жетекшісі Светлана Заурбековаға алдағы уақытта тұрғындарға заң талаптары мен ережелерін түсіндіріп, жиын өткізуді ұйымдастыруда көмек көрсету керектігін атап өтті. Сондай-ақ әрдайым тұрғындармен сұхбат жүргізіп, мәселенің механизмдерін қарастыруды тапсырды.
Жиын соңында қандай мәселе барын сұраған Айбек Кәрімовке аула тұрғындары қураған талдардың көп екенін, құлаған жағдайда үйдің төбесін қиратанынын айтып, ағаштарды кесу үшін көмек сұрады. Қала әкімі бұл мәселенің орынды екенін, онымен ТҮКШ бөлімі айналысатынын айтып, оған тиісті шара қолданатынын жеткізді.
Асан МЫРЗАХАНОВ,
«Семей таңы»
