Жаңа жыл қарсаңында Қазақстанда ардагерлерді жалпыұлттық қолдау акциясы өтті. Акция аясында барлық облыс, қала, аудан әкімдері ардагерлерді аралап, жеке құттықтап, Президент атынан сыйлықтар табыстады. Президенттің құттықтауы республикада тұратын 5 115 ардагерді қамтыды.
{jcomments on}2015 жыл — Жеңістің 70 жылдығы әрі ТМД елдерінде Ардагерлер жылы. Осыған орай Семей қаласының басшысы Айбек Кәрімов бірқатар ардагерлердің үйлеріне барып, Елбасы хатын және әрбіріне Президент атынан сыйлықтар тарту еткен еді.
Өткен дүйсенбіде осындай игі бастамамен қала әкімі аппаратының басшысы Шаған Жұмақсанов қаламызда тұратын соғыс ардагері, тоқсан жасты еңсеріп отырған Қалиасқар Ысқақов ақсақалды Жаңа жылымен құттықтап, Елбасы Н.Назарбаевтың құттықтауын жеткізді.
93 жасқа келген майдангер 1941 жылы соғысқа аттанып, Мәскеу түбіндегі ұрыстарға қатысады. Сол кескілескен ұрыстардың бірінде жараланып, ауруханаға түседі. Кейін майдангер өзі сұранып, соғысқа қайта аттанады. Жауға қарсы тұрған Қалиасқар Ысқақов Кутузов дивизиясының ержүрек барлаушысы атанған. Ол «Отанды қорғағаны үшін», «Ұлы Отан соғысы» ордені мен «Мәскеуді қорғағаны үшін», «Германияны жеңгені үшін», «Ерлігі үшін» және басқа да медальдарды кеудесуіне тақты.
Қарт майдангер Елбасының «Нұрлы Жол – болашаққа бастар жол» Жолдауын қолдайтынын, Елбасының саясатының кемел екенін, қазір еліміз тыныш, экономиканың өрлеп, дамып жатқанын жеткізді. Сондай-ақ, ол Елбасының майдангерлерге осындай көңіл бөліп, жасап отырған қамқорлығына алғысын айтты. Қала әкімі аппаратының басшысы Шаған Жұмақсанов ардагерді жаңа жыл мерекесімен құттықтап, зор денсаулық тіледі.
Асан МЫРЗАХАНОВ, «Семей таңы»
