Семейліктер жылдағы дәстүр бойынша 31 желтоқсан күні Жаңа жыл мерекесін Орталық алаңдағы биік те әсем шырша маңында мерекеледі. Алаңға жиналған жұртшылық үшін қаладағы өнер ұжымдарының концерттік бағдарламасы мен театрландырыл- ған қойылымдары ұсынылды.
{jcomments on}Мерекеге арнайы дайындалған концерттік бағдарламалар тұрғындарды шаттыққа бөледі. Ал балалар жағы Аяз ата мен Ақшақармен естелік суретке түсіп, қуаныштан жүздері бал-бұл жанды. Орталық алаңдағы алып шырша маңына жиналған жұртшылық бір-бірін мерекемен құттықтап, жылы лебіздерін білдірді.
— Жаңа Қой жылы құтты болсын! Құтты жыл болсын. Елімізде әрдайым тыныштық болып, әр отбасы қуанышқа кенеле берсін. Өткен жыл да есте қаларлықтай жыл болды. Қой жылында да, лайым, жақсылық болсын. Семейіміз гүлдене берсін, — деді қала тұрғындарының бірі Дидар Байғазинов.
Мерекелік кешке сән берген Аяз ата мен Ақшақар да сахна төріне көтеріліп, өз тілектерін жеткізді. «Жаңа жылда тек жақсылықтар көп болсын»,- десті. Ертегілер әлемінің кейіпкерлері де театрландырылған көріністер көрсетіп, көпшіліктің көңілін сергітті.
Орталық алаңдағы жаңажылдық мерекеге қала әкімінің орынбасары Зәуреш Исабаева мен қалалық мәслихаттың хатшысы Бейсенбек Ақжалов келіп, жұртшылықты Жаңа жылмен құттықтап, ізгі тілектерін білдірді.
— 2014 жыл – еліміз үшін, соның ішінде Семей үшін, табысқа толы жыл болды. Алға қойған барлық жоспарлар сәтімен жүзеге асты. Оған қала жұртының да қосқан үлесі зор деуге болады. 2015 жыл да Семей үшін табысты жыл болады деп сенеміз. Қой жылы ырыс пен молшылықты ала келсін. Дендеріңіз сау болсын. Әр шаңырақтан сәбидің сыңғырлаған күлкісі кетпесін. Әрбір отбасына береке-бірлік тілеймін. Жаңа жылдарыңыз құтты болсын! — деп, өзінің тілегін айтқан Зәуреш Исабаева жұртшылықты қала әкімі Айбек Кәрімовтің атынан да құттықтады.
Өз кезегінде сөз алып, Орталық алаңға жиналған көпшілікті жаңа жылмен құттықтаған қалалық мәслихаттың хатшысы Бейсенбек Ақжалов жұртшылыққа зор денсаулық, мол бақыт, ашық аспан, ынтымақ пен ырыс, береке-бірлік тіледі.
Жаңа жыл кеші өнер ұжымдарының концертімен жалғасты. Концертте бірқатар өнер майталмандары әннен шашу шашты. Осылайша, қала жұрты ескі жылды шығарып салып, қой жылын салтанатты түрде қарсы алды. Күннің суықтығына қарамастан, семейліктер Орталық алаңдағы әсем шырша маңында Жаңа жылды көтеріңкі көңіл-күймен мерекеледі.
Нұрдәулет КӘКІШЕВ, «Семей таңы»
