Жеңістің 70 жылдығына орай елімізде соғыс ардагерлерін ұлықтап, қолдау бойынша жалпыұлттық акция өтіп жатқаны мәлім. Ауқымды шараға қарулы күштеріміз де атсалысуда. Мемлекет басшысы Н. Назарбаевтың тікелей бастамасымен «Жеңіске құрмет» атты акция-марафон өткізілуде. Қаңтардың алтысы күні аталмыш акция аясында гарнизондық офицерлер үйінде салтанатты жиын ұйымдастырылды. Шара барысында жеңіс алауын табыстау рәсімі өтіп, ардагерлерге құрмет көрсетілді.
Акция — марафонды өткізудегі басты мақсат – Отан үшін от кешкен батырлардың ерліктерін еске алып, ұрпақтар сабақтастығын паш ету. Салтанатты жиын барысында Шығыс өңірлік қолбасшылығы әскерлерінің қолбасшысының тәрбие және әлеуметтік-құқықтық жұмыстар жөніндегі орынбасары, полковник Азамат Мұқатаев сөз сөйледі. Құттықтау тілегін айта келе, ол ардагерлердің бүгінгі таңда қаламыздың қоғамдық өміріне белсене араласып, өскелең ұрпақтың патриоттық тәрбиесіне атсалысып жүргендіктерін атап өтті.
— Аға буынның үлгісімен жас ұрпақтың бойына отансүйгіштік, мейірімділік пен әділдік сезімдері ұялап, Отанына және өз борышына адалдық қалыптасады. Ардагерлерге құрмет көрсетуді парыз деп санаймыз. Сондықтан соғыста ерлік жасаған батырларды құттықтау — үлкен мәртебе. Қымбатты ардагерлер, Сіздерді Жеңістің жетпіс жылдығының басталуымен және ардагерлер жылымен құттықтаймын. Баршаларыңызға зор денсаулық, ұзақ та бақытты ғұмыр тілеймін, — деді Азамат Мұқатаев.
Сондай-ақ, шара барысында ардагерлер қауымына гүл шоқтары мен сыйлықтар тарту етілді. Соғыс ардагерлері атынан сөз сөйлеген Ғазиз Ахмеров ақсақал жиналғандарды жаңа жылмен құттықтап, ризашылығын білдірді. Ардагерлерге құрмет көрсетіп жатқаны үшін, Мемлекет басшысына алғысын айтты.
{jcomments on}- Елбасының ардагерлерге деген пейілінің ерекше екенін жаңа жылдың қарсаңында ардагерлердің әрқайсысына жеке-жеке құттықтауын арнап, сыйлықтар тарту етуінен-ақ байқауға болады. Жеңіске жеткенімізге жетпіс жыл болды. Бірақ ерлердің есімдері жадымызда көмескі тартқан емес, көмескіленбейді де. Бүгінгі жастар майданда батырлықтың небір үлгісін көрсеткен ержүрек жандардың ұрпағы деген атқа лайық болуға ұмтылулары керек. Аталарынан отанға деген адалдықтың, ерліктің не екенін үйренулері қажет. Жастарымыздың жүректерінде Отанға, яғни Қазақстан Республикасына деген махаббат оты сөнбей, алаулап, маздай берсін, — дей келе, Ғазиз ақсақал еліміздегі тыныштықтың сақтала беруін, жұртымыздың, жас ұрпақтың зеңбіректің, оқ-дәрінің атыл- ған дыбысын естімей, бейбітшілікте бақытты ғұмыр кешуін, бірлік пен татулықтың нығая түсуін тіледі.
Семей қалалық ішкі саясат бөлімі басшысының орынбасары Игорь Панин ардагерлерге лебізін жеткізді. Ол жеңістің жетпіс жылдығының жылы аясында ардагерлерге құрмет көрсетудің жыл басынан басталуының үлкен мәнге ие екенін атап өтті.
— Биылғы жыл Сіздер үшін ғана емес, бүкіл еліміз үшін ерекше. Себебі жас ұрпақ сіздерді үлгі тұтып өсіп келе жатыр. Жетпіс жыл деген — аз уақыт емес. Жеңіске жеткен жылы дүниеге келгендер қазір балалары, немерелері бар зейнеткер қария атанып отыр. Бірақ біз, Тәуелсіз Қазақстан Республикасының халқы, ұрпақтар сабақтастығын сақтап, сұрапыл соғыс жылдары аталарымыздың жасаған ерліктерін жадымызда тұтып келе жатырмыз,- деген Игорь Панин соғыста жеңіске жету арқылы ардагерлердің тұтас әлемді аман сақтап қалғанын айтты.
Бұдан бөлек жиналған қауым алдында қалалық ардагерлер кеңесі төрағасының орынбасары Рашида Хасанова сөз сөйлеп, тілегін жеткізді. Ардагерлерге қамқорлық көрсетіп келе жатқан Елбасыға алғыс айтты. Елімізде тыныштықтың сақталуын, бейбітшілік пен татулықтың нығаюын тілеп, жылы лебізін білдірді.
Сонымен қатар шара барысында Жеңіс алауын тапсыру салтанаты өтті. «Жеңіске құрмет» марафон-акциясы аясында бесінші қаңтар күні Қарағанды қаласында Астана өңірлік қолбасшылығынан қабылдап алған Жеңіс алауын Шығыс өңірлік қолбасшылығының әскерилері Қапшағай гарнизонының өкілдеріне табыстады. Шара соңында ардагерлер назарына Гарнизондық офицерлер үйінің өнерпаздары әзірлеген концерттік бағдарлама ұсынылды.
Мирас ҚҰСАЙЫН, «Семей таңы»
