Шығыс Қазақстан облыстық Невзоровтар отбасы атындағы бейнелеу өнері мұражайында жергілікті суретшілер арасында өткен көрме байқаудың қорытындысы жарияланып, сайыста үздік шыққандар марапатталды. Салтанатты рәсімге қала әкімі Айбек Кәрімов пен қалалық мәслихат хатшысы Бейсенбек Ақжалов қатысты. Бұл жергілікті суретшілердің туындылары қойылған бірінші көрме емес. Дегенмен байқау түрінде мұндай шара бейнелеу өнері мұражайында екінші рет өткізілді. Биылғы көрмеге жалпы саны қырық төрт жергілікті автор қатысты. Араларында бейнелеу өнерінде қалыптасқан, мол тәжірибе жинақтап үлгерген, өзіндік қолтаңбаларын, ерекшеліктерін айқындаған аға буын өкілдерімен қатар, осы сала бойынша білім алып жатқан жас қылқалам шеберлері де бар.
Көрмеге ұзын саны жүзге жуық көркемсурет туындылары қойылған. Көпшілігі живопись және кескіндеме әдістерінде салынған. Ұйымдастырушылар байқау — көрменің жас талантты суретшілерді анықтап, білуге ғана емес, бұрыннан танымал қалыптасқан өнер иелерін ерекше қырларынан тануға мүмкіндік бергенін айтады.
{jcomments on}
— Жергілікті суретшілер туындыларының көрмесі – қаланың мәдени-рухани өмірінде ерекше орын алатын шара. Себебі қаланың тіршілігінің негізгі бастауларының бірі – шығармашылық. Семей қаласының мәдени ортасында орын алып жатқан үрдістердің көрсеткіші болып саналатын бейнелеу өнерін өзіндік ерекшелігі бар шығармашылықтың айрықша бір түрі деп айтуға әбден болады,- деді Шығыс Қазақстан облыстық Невзоровтар отбасы атындағы бейнелеу өнері мұражайының директоры Наталья Стромская. Сондай-ақ, ол өңіріміздегі бейнелеу өнерінің тарихы жайлы айта келе, ойын былай деп жалғастырды:
— Қазіргі таңда кәсіби суретшілеріміз өнерден қол үзбей, шығармашылықтарын жалғастырып келеді. Өздерінің туындыларын бізге ұсынуда. Көрмелерді ұйымдастырудағы мақсатымыз – суретшілеріміздің шығармашылық тұрғыда дамуына демеу боларлық ерекше рухани — мәдени ортаны қалыптастыруға көмектесу. Сонымен қатар жас қылқалам шеберлерін көптеп тартуды көздедік. Осы жолғы көрме барысында жаңа дарынды жас суретшілердің барын байқап, есімдерін таныдық.
Қала әкімі Айбек Кәрімов пен қалалық мәслихат хатшысы Бейсенбек Ақжалов марапаттау рәсімінің құрметті қонақтары болды. Сондай-ақ, шараға Семей қаласы сәулет және қала құрылысы бөлімінің, «Жылукоммунэнерго» МКК-нің өкілдері, байқау — көрменің демеушісі «АзияCombi» ЖШС-нің директоры Владимир Филичкин, оқытушылар мен студенттер және жергілікті суретшілер шақырылған. Байқау көрме қорытындысына сәйкес, бірнеше аталым бойынша жүлдегер атанған суретшілер дипломдармен, ақшалай және бағалы сыйлықтармен марапатталды. Қатысушылардың бірқатары ынталандыру сыйлықтарын иеленді.
Семей қаласының әкімі Айбек Кәрімов салтанатты жиынға қатысушыларды кезекті байқау көрменің өтуімен құттықтап, мұндай шараның ұйымдастырылуы мұражай үшін ғана емес қала өмірі үшін де маңызы зор екенін атап өтті.
— Мен қаламыздың мәдени орталық деген атын сақтауға үлес қосып, өңіріміздің мәдени бейнесін қалыптастырып жүрген барлық талант иелерін, суретшілерді, жалпы өнер саласының өкілдерін қатты құрметтеймін. Біз өте күрделі өтпелі кезеңді басымыздан өткердік. Осы орайда экономикалық мәселелер, коммуналдық саладағы түйткілдер келімді — кетімді құбылыстар болып табылады, ал руханият, мәдениет және дәстүр дегеніміз ешқашан маңызын жоғалтпайтын мәңгілік құндылықтар дегім келеді. Бүгінгі таңда қаламыз жаңа сапалық деңгейге көтеріліп келеді, сондықтан келешекте біздің суретшілеріміз қолдаусыз қалмайды,- деді Айбек Мүталапханұлы
Сондай-ақ қала басшысы кәсіпкерлерге келесі байқау көрменің сыйлық қорының көлемін бір миллион теңгеден кем болмайтындай ету жайлы ұсыныс білдіретінін жеткізді. Сөзінің соңында Айбек Кәрімов жиналғандарды жаңа жылмен құттықтады. Қатысушылардың барлығына мықты денсаулық, жетістік тілеп, елімізде тыныштық пен өзара сыйластықтың, татулықтың, бейбітшіліктің нығаюына, табыстан табысқа жете беруге тілектестігін жеткізді.
Мирас ҚҰСАЙЫН,
«Семей таңы»
