Мемлекеттік қызметкерлер арасындағы дәстүрлі қалалық спартакиада аясында шаңғымен сырғанаудан жарыс өтті. Спорттық бәсекеге жиыны он төрт команда қатысты. Жарыс қорытындысы бойынша жеңімпаздар марапатталып, алдағы уақытта өтетін облыстық спартакиада қала намысын қорғау мүмкіндігіне ие болды.
Жарысты ұйымдастырған қалалық дене шынықтыру және спорт бөлімі мамандарының айтуынша, спартакиаданы өткізудегі мақсат салауатты өмір салтын насихаттау көрінеді. Спорттық бәсекеге қаламыздағы барлық мемлекеттік мекемелер мен құзырлы органдар атынан командалар қатысты. Айта кетерлігі, дәстүрлі спартакиада осымен он бесінші рет өткізіліп отыр. Жарыстың ашылу салтанатында қалалық дене шынықтыру және спорт бөлімінің басшысы Мұрат Құржықаев қатысушыларды құттықтап, сәттілік тіледі.
{jcomments on}
— Бүгінгі жарысқа қатысуға келгендеріңіз еш өкінбейсіздер деген ойдамын. Салауатты өмір салты — денсаулық кепілі. Бүгінгі жарысқа қатысумен шектеліп қалмай, алдағы уақытта да спортпен шұғылдана беруге шақырамын,- деді Мұрат Құржықаев. Сонымен қатар ол өңірімізде шаңғы спортының даму қарқыны кейінгі жылдары жоғары деңгейге көтеріліп келе жатқанын атап өтті. Соның бір дәлелі ретінде былтыр Сочи олимпиадасында жерлесіміз Ердос Ахмедиевтің қатысуын, Галина Вишневскаяның биатлоннан жастар арасында әлем чемпионы атануын айтып өтті. Бұдан бөлек Мұрат Мұрсаханұлы шаңғы спортының дамуына серпін беретін спорттық нысандар санының да арта бастағаны жайлы сөз етті. Мәселен, таяуда Семей мемлекеттік медициналық университеті жанында жаңадан шаңғы базасы ашылса, Семей қаласының Шәкәрім атындағы мемлекеттік университеті өзінің шаңғы базасының жұмысын жетілдіруге көңіл бөліп жатқан көрінеді.
— Мұндай шаруалардың атқарылуы қаламыздағы шаңғы спортының өркендеп кең қанат жаюына септігін тигізері анық. Себебі арнайы нысандардың саны көбейген сайын, шаңғы спортымен айналысуға ниеттілердің қатары да арта түседі. Шаңғы спортымен айналысушылардың қатарының артқаны – сәйкесінше, біздің өңірімізден спорттың бұл түрінен жетістікке жетуге қабілетті азаматтардың көптеп шығуы үшін қажетті алғышарттарының бірі, — деді дене шынықтыру және спорт бөлімінің басшысы.
Жалпы, осы жолғы қалалық спартакиаданың өткен жылға қарағанда, бір ерекшелігі бар. Ол — жарыстың бір ай көлемінде емес, төрт ай бойы өткізілуі. Яғни бұл жолы спартакиада 2014 жылдың қазан айында басталып, биылғы қаңтар айында өз мәресіне жетті.
Шаңғы тебуден жарысқа келетін болсақ, спорттық бәсеке барысында ерлер үш шақырымдық қашықтықта, ал әйелдер бір жарым шақырымдық қашықтықта сынға түсті. Күштік құрылымдар арасында 25 ұпай жинаған «Шығыс» өңірлік қолбасшылығының шаңғышылары үздік болып шықты. Екінші орынды одан үш ұпай кем жинаған ҚР ІІМ ТЖК иеленді. Ал мамандандырылған күзет қызметінің командасы үздік үштікті түйіндеді. Мемлекеттік қызметкерлер арасында қалалық соттың спортшылары өздерінің мықты екенін дәлелдеді. Екінші орынға мемлекеттік кірістер департаментінің шаңғышылары қол жеткізді. Ал қалалық қазынашылық басқармасының командасы жеңіс тұғырының үшінші сатысынан табылды. Жеңімпаздар мен жүлдегерлер ұйымдастырушылар тарапынан бағалы сыйлықтармен және грамоталармен марапатталды. Сондай-ақ, үздік шаңғышылар алдағы уақытта қала құрамасының сапына еніп, жуық арада өтетін облыстық спартакиадада қала намысын қорғайтын болады.
Мирас ҚҰСАЙЫН,
«Семей таңы»
