Рождество – діни мазмұнына қарамастан, Қазақстанда тұрып жатқан барлық ұлттар өкілдері үшін ортақ мейрамға айналған ерекше мереке. Семей қаласының Достық үйінде орыс әлеуметтік-мәдени орталығы концерт ұйымдастырып, шағын қойылым көрсетіп, мерекені ерекше атап өтті.
Орыс диаспорасының өкілдерінен бөлек, басқа да мәдени орталықтардың мүшелері, қала мектептерінің оқушылары да Рождество мерекесіне арналған концертті көруге келгендердің көптігінен көрермендер залында бос орын болмады.
— Бұл — жалпы жұртшылыққа, Қазақстан жұртшылығына ортақ мейрам. Себебі хрис-тиан діні ғасырлар бойы Ислам дінімен тығыз байланысы бар қоғамның мәдениетін қалыптастырып келеді. Бұл дегеніңіз — негізгі екі діннің басқа мемлекеттерге қарағанда тұрақты да тыныш, салауатты қоғам қалыптастыруға септіктерін тигізген симбиозы. Елімізде татулық пен бірлікті, өзара келісімді ту етіп, көптеген ұлттардың өкілдері жарасымды өмір сүріп жатыр. Қазақстанымызда көптеген мәдениеттер мен негізгі екі дін бір арнаға тоғысты. Біз бейбітшілік пен тұрақтылық салтанат құрып тұрған осындай бақуатты мемлекетте тұру мүмкіндігін сыйлаған Жаратушымызға мың мәрте тәуба дейміз,- деді жиналған қауым алдында сөйлеген сөзінде Воскресен соборының діни қызметкері Михаил әкей.
Кеш жүргізушілері көрермендерге әртүрлі елдердің Жаңа жыл мерекесі мен Рождествоны атап өтуіндегі негізгі дәстүрлері жайлы айтып өтті. Сондай-ақ, шараға қатысушы әртістерді таныстырды. Олардың арасында татар мәдени орталығының мүшелері де бар.
{jcomments on}- Барлық Семей қаласының тұрғындарын Қазақстан халқы Ассамблеясының жылы деп жарияланған Жаңа 2015 жылдың келуімен құттықтағым келеді. Бүгінде қаламыздың мәдени орталықтары Достық үйі шаңырағының астында бірлік пен татулықта бірлесе жұмыс жасап келеді. Әрбір шараны біз әртүрлі орталықтардың қатысуымен өткіземіз. Барлық халықтық мерекелерді, Сабантой сияқты ұлттық мерекелерімізді атап өтуге, тойлауға белсене атсалысып келе жатқан орыс мәдени орталығын ерекше атап өткім келеді. Біз үшін бірлесе жұмыс істеуге жағдай жасау өте үлкен маңызға ие. Себебі бірлесе жұмыс жасай жүріп, біз бір-бірімізге көмектесуді үйренеміз, — дейді Татар қоғамдық мәдени бірлестігінің жетекшісі Камилия Исмаилова.
Орыс әлеуметтік-мәдени орталығының өкілдері қаламыздағы барлық мәдени шаралар-ға қуана-қуана қатысатындықтарын және Достық үйінің қанатының астында жұмыс істейтін барлық орталықтарға қолдау көрсетуге әр-дайым дайын екендіктерін айтады.
Мирас ҚҰСАЙЫН, «Семей таңы»
