Ежелден келе жатқан ата дәстүрімізде де, тәуелсіз еліміздің қоғамдық өмірінде де анаға деген қадір-құрмет, әрине, ерекше. Ертеден батырлар мен ақындардың алтын бесігі атанған Жарма өңірі облыс халқына көп жасайтын жандарымен де бүгінде аты мәшһүр. Қарты бардың қазынасы бай екендігін ертеден бағамдаған дана халқымыз. Киелі мекеннің береке бастауы болып отырғаны да көңілі дария қарияларымыздың еншісі деп білеміз. Аптаның төртінші жұмыс күні Жаңаөзен ауылының тұрғыны Майшыбаева Әдемі Батталқызы 100 жасқа толып, ғасырды еңсерген қариялардың қатары кейуанамен толықты. Көңілі дария қарияны мерейлі жасымен аудан әкімі Әнуарбек Мұхтарханов арнайы шаңырағына барып құттықтады. Балалары мен жақын туыстарының ортасында қуанышқа кенеліп отырған қарияның қолын алған аудан басшысы туған күнімен құттықтап, үлкен әулеттің алтын діңгегі болған анаға алдағы уақытта да шаңырақтың шырайын ашып, берекесін келтіріп отыра беруіне тілектестігін жеткізіп, зор денсаулық тілеп, арнайы құттықтау хаты мен сыйлығын табыс етті.
{jcomments on}Әдемі әжей — өмірдегі қиыншылықты да, қиянатты да, жақсылық пен жамандықты да басынан өткерген жандардың бірі. Бүгінде бейнетінің зейнетін көріп отырған кейуана Тәуелсіздіктің баянды заманына куә болғанына мың да бір шүкіршілік етеді. Жолдасынан жасынан айырылса да, дүниеге әкелген жеті баласын өсіріп-жеткізіп, бақытын балаларынан іздеген қария бүгінде мұратына жетіп отыр.
– Отағасы дүние салған соң, амал жоқ үйдiң бар ауыртпалығы менің иығыма түстi. Тағдырдың тауқыметiне төзіп, кездескен сыннан сүрінуге болмады. Қиналып жүріп адал еңбек еттім. Балаларымның бәрін де тарықтырмай өсірдім. Құдайға шүкір, ешқайсысы да жаман болмады. Соның арқасында Алланың берген жасын жасап, еңбегімнің зейнетін көріп отырмын, — деген Әдемі әжей, бүгінде 16 немересінен 7 шөбере сүйіп отыр.
Көңіл бөліп, қамқорлық танытқан аудан әкіміне аналық алғысын білдіре келе, егемен еліміздің бір парасы болып отырған ауданымыздың игілігі артып, жетістігі молынан болсын деген тілегін жеткізіп, ақ батасын берді.
Жетімі мен жесірін жылатпаған дана халықтың бүгінгі ұрпағы да басты ұстанымнан таймай келеді. Мемлекеттің тікелей тарапынан жасалып жатқан қамқорлықтың арқасында біздің елімізде Әдемі апа тәрізді қарияларымыздың көбейе беретіндігі сөзсіз. Ал бүгінгі күні 100 жастың төріне шат-шадыман күймен өрлеген той иесін мерейлі шағымен шын жүректен құттықтаймыз.
Мейірхан ОСПАНБАЕВ,
Жарма ауданы.
