Бүгінде Бесқарағай ауданындағы бетке ұстар ірі шаруа қожалығы ретінде Ерназар ауылының тумасы Хабидолла Қабдылұлы Мукинов басшылық ететін «Мукинов» шаруа қожалығын мақтанышпен айтуға болады. Ерназар ауылдық округінің аумағында 2001 жылдың желтоқсан айында құрылған қожалық үлкен еңбектің арқасында осы күні толағай табыстарға қол жеткізіп келеді. Шаруа қожалығының қарамағында 7141,9 гектар ауыл шаруашылығына жарамды жері бар. Шаруашылықта тұрақты түрде 20 адам, сонымен қатар жазғы науқан кезінде қосымша 15 адам маусымдық жұмысқа жұмылдырылатын көрінеді.
{jcomments on}Шаруашылықты жүргізуге қажетті 1 К-700 дөңгелекті, 2 шынжыр табанды, 3 МТЗ-82, 5 МТЗ-80 тракторлары, СК- «Нива» комбайны және шөп шабатын, жинайтын техникалары бар. Ең бастысы, шаруа қожалығы төрт түлік малдың үш түрін – жылқы, ірі қара және қой өсірумен айналысып, Семей мал-дәрігерлік институтының түлегі, өз кәсібінің шебері ретінде қожалықты құрғаннан бастап малды асылдандыру жұмыстарына барын салып келеді.
Бүгінгі күнде 700 бас жылқысы, 770 бас ірі қарасы, 1200 бас қойы бар аталмыш шаруа қожалығы – толығымен асылтұқымды шаруа қожалығы дәрежесіне ие. Нақтырақ айтқанда, 2010 жылдың ақпан айында «қазақтың жылқысын өсіруші асылтұқымды жылқы шаруашылығы» атағын алса, 2011 жылдың желтоқсан айында «қазақтың жылқысын өсіруші асылтұқымды жылқы зауыты» деген дәрежеге қол жеткізген еді. Қазіргі таңда «Мукинов» шаруа қожалығы аудандық, облыстың, республикалық, халықаралық деңгейдегі іс-шараларға қатысып, қожалық басшысы өзін туған жерінің нағыз патриоты ретінде танытуда. Мысалы, 2013 жылдың тамыз айында Абай ауданында бірінші рет өткен облысаралық «Шыңғыстау» жәрмеңкесінде «Мукинов» шаруа қожалығының асылтұқымды қазақтың жылқысы бас бәйгені қанжығаға байлап, көрме чемпионы атанса, өткен жылы сол жәрмеңкеде І орынды жеңіп алды. Айта кету керек, Семей қаласының әкімдігі мен Шәкәрім университетінің ұйымдастыруымен Шығыс Қазақстан облысы ауылшаруашылық өнімдерін өндірушілердің «СемейАгро – 2013» көрмесінде де «Мукинов» шаруа қожалығы 3 бас асылтұқымды қазақтың жылқысын, «Лана» шаруа қожалығы 3 бас асылтұқымды қазақтың ақ бас сиырын, «Қаликанұлы», «Балке» шаруа қожалықтары өздері өндірген сүт және көкөніс өнімдерін ұсынып, диплом, кубокпен, сертификатпен марапатталған болатын. Сондай-ақ, 2009 жылдың шілде айында асылтұқымды қазақтың ақ бас сиырын өсіруші шаруашылық атанып, 2012 жылдың қараша айынан бастап қазақтың ақбас сиыры тұқымының Республикалық Палатасының мүшелігіне енгендігін де ерекше атап өтуге болады.
Соңғы уақытда аудан көлемінде мал тұқымын жаңалау жұмысымен 40-тан аса шаруа қожалықтары айналысуда. Шаруашылықтардың қарамағындағы малды асылдандаруға Х.Мукинов үлкен қолдау көрсетіп, септігін тигізуде. Өткен жылы 1 мамыр – халықаралық ынтымақ күні мерекесіне орай, Ерназар ауылында киіз үйлер тігіліп, бәйге, көкпар тарту, қыз қуу, теңге алу, Қазақ күресі сияқты ұлттық ойындардан жарыстар өткізілген болатын. Ұлттық дәстүрімізді дәріптеген үлкен мейрам айрықша аталды. Ерназар ауылдық округінде тұратын барлық ұлт өкілдері өз ұлттық киімдерін киіп, ауданнан, шеттен келген қонақтарға, ауыл тұрғындарына үлкен концерт ұсынған еді. Осы күні өткен барлық іс-шаралардың және жеңімпаздарға берілген сыйлықтардың шығынын «Мукинов» шаруа қожалығының басшысы Х.Мукиновтың бір өзі көтергендігін, желтоқсанда «Мукинов» шаруа қожалығы қазақтың асылтұқымды құйрықты қылшық жүнді қой шаруашылығын дамыту бойынша да асылтұқымды шаруашылық атанғандығын айрықша атап өтуге болады.
Бұл — төрт түлік малдың үш түрінен асылтұқымды мал өсіріп отырған аудан, қала берді облыс көлеміндегі бірден-бір шаруашылық екендігінің дәлелі болса керек. Шаруа қожалығының басшысы Хабидолла Қабдылұлы Мукинов — ауданда, округте өтетін іс-шараларға демеушілік танытып қана қоймай, өзі мұрындық болып, жерлестерінің алғыстарына бөленіп жүрген ардақты азамат. Ол Ерназар ауылындағы орта мектепке қолдау көрсетуден аянып қалған емес. Төменгі сыныптағы оқушыларды тегін тамақтандырып, балмен қамтамасыз етіп қана қоймай, одан басқа мектепке күрес кілемін тарту етіп, футбол алаңын жасап, автобус тұратын гараж салу үстінде. Ерназар ауылының кіреберісіне стелла орнатқандығы да белгілі.
Осындай ауыз толтырып айтарлықтай ауқымды істері, еңбектегі жеткен жетістіктері және өз туған еліне, жеріне деген құрметін аудан басшылығы бағалап, марапатқа ұсынып, Хабидолла Қабдылұлы 2013 жылы «Ерен еңбегі үшін» медалімен марапатталды.
Ә. ЗАИТОВА,
Бесқарағай ауданы.
