Семей қалалық жұмыспен қамту және әлеуметтік бағдарламалар бөлімінің мәліметіне сүйенсек, 2015 жылдың 1 қаңтарындағы деректер бойынша еңбек нарығындағы жұмыссыздар саны өткен жылмен салыстырғанда 28,2 пайызға азайған.
{jcomments on}Бүгінде қаламызда жұмыссыздықты жою мақсатында әртүрлі әлеуметтік бағдарламалар жүзеге асырылуда. Оның ішінде жұмыспен тұрақты және нәтижелі қамтуға жәрдемдесу арқылы халықтың табысын арттыруды көздейтін, республикалық және қалалық бюджеттен қаржыландырылатын «Жұмыспен қамтудың жол картасы – 2020» бағдарламасын атап өтуге болады. Бағдарлама жұмыссыз, әлеуметтік жағынан аз қамтылған жандарды жұмылдыра отырып, оларға еңбек ету арқылы тұрмысын түзеуге мүмкіндік береді.
Өткен жылы жұмыспен қамту және әлеуметтік бағдарламалар бөлімінің қаланы дамыту бағдарламалары аясында 3870 адам жұмыспен қамтылған. Сонымен қатар еңбек нарығындағы сұранысқа сай, бәсекеге қа-білетті мамандар дайындау мақсатында кәсіптік оқыту жүзеге асырылуда. 355 жұмыссыз адам электрогазбен дәнекер-леуші, күш желілері және электр жабдықтары бойынша электр монтаждаушы, слесарь, кран машинисі, ауыл шаруашылығы өндірісінің тракторист — машинисі, ағаш өңдеу станогының маманы, плиташы — қаптаушы, аспаз — кондитер, шаштараз, тігінші, аспаз — калькулятор, пісіруші, маникюр шебері, хатшы -референт, автокөліктің электр жабдықтарын жөндейтін электригі, ЭЕМ операторы және 8.2 нұсқадағы 1С бухгалтері сынды 16 мамандық бойынша кәсіптік оқыту курстарына жолданған.
Сондай-ақ, оқу орнын бітірген жас түлектерді жұмысқа орналастыру мәселесінде «Жастар тәжірибесі» бағдарламасының маңызы зор. Аталмыш бағдарлама арқылы қолдарына енді ғана диплом алған түлектерге алғашқы тәжірибе жинақтауға, мамандықтары бойынша келісімшарт негізінде 6 ай жұмыс істеуге мүмкіндік береді. Бұл бағдарламаға 230 жас маман қатысқан. Олар қаламыздағы және ауылдық округтердегі әртүрлі 103 кәсіпорында заңгер, экономист, мұғалім, техник-программист, бухгалтер, медбике және өзге де мамандар ретінде жұмыс істеп, теориялық білімдерін тәжірибемен ұштастырған. «Жастар тәжірибесі» бағдарламасына қатысушыларға еңбек кітапшасы ашылып, оларға мемлекеттік бюджеттен айына 31 854 теңге жалақы төленді.
Нысаналы топтардағы жұмыссыздарды жұмысқа орналастыру үшiн «Әлеуметтік жұмыс орны» бағдарламасы бар. Бағдарлама негізінде жұмыс берушілер уақытша жұмыс орындарымен қамтиды. Бұл бағдарламаға нысаналы топтардан 164 жұмыссыз қатысып, қала және ауылдық округтердегі 38 кәсіпорында еңбек еткен. Жұмыс берушiлер олардың еңбегiне 19 966 теңге тағайындап, жұмыссыздар жарты жылға дейінгі уақытта еңбектерін жалғастырған.
Қала және ауылдық округтердегі 112 кәсіпорында ұйымдастырылған қоғамдық жұмыс еңбек нарығындағы жағдайды біршама өзгертті. Оған 1 166 жұмыссыз қатысқан. Орташа айлық жалақы 19 966 теңгені құраған.
Қоғамдық жұмысқа қатысушылар қала және ауылдық округтердің қоғамдық аумақтарын көркейтуге, көгалдандыруға көмектесіп, мұрағаттық құжаттармен жұмыс іс-теуге, іс-қағаздарын жүргізу бойынша жұмысқа көмектесуге және өзге де жұмыс түріне жұмылдырылған.
Бұл бағдарламалардың барлығы да қаланың еңбек нарығына айтарлықтай өзгеріс енгізді.
2015 жылдың 1 қаңтарындағы деректер бойынша, еңбек нарығындағы жұмыссыздар саны өткен жылмен салыстырғанда 28,2 пайызға азайған.
2015 жылы да Семей қаласында халықты жұмыспен қамту, жұмыссыздықты жою бағытында мемлекеттік бағдарламалар аясында ауқымды жұмыстар жүргізіледі деп жоспарлануда.
Семей қалалық жұмыспен қамту және әлеуметтік бағдарламалар бөлімінің ақпараты бойынша
дайындаған
Әйгерім СӘРСЕНҒАЛИ.
