Өткен аптада Абай ауданының Медеу, Саржал, Тоқтамыс, Кеңгірбай би, Көкбай, Құндызды, Архат және Қасқабұлақ сынды ауылдық округтерінде аудан әкімі және ауыл әкімдерінің жұртшылыққа жыл сайынғы есеп беру жиналыстары болып өтті. Нақтырақ айтсақ, қаңтар айының 23 жұлдызында аудан әкімі Т. Мүсәпірбеков пен Қарауыл ауылдық округінің әкімі Қ. Берлешовтің халыққа есеп беру басқосуы жылдағыдан өзгеше түрде бірге болып өтті.
{jcomments on}Аудандық мәдениет үйінде өткен келелі есеп беру жиналысына аудан халқымен қатар, мекеме басшылары, қызметкерлер, жұмысшылар қатысты. Жиынды аудандық мәслихаттың хатшысы Төлеубек Аманғазы жүргізіп, төрағалық жасап отырды. Соңғы ста-тистикалық деректерге сүйенсек, облысымыздағы әлеуметтік-экономикалық өсім деңгейі бойынша Абай ауданы көшбасшылардың қатарында. Бұл — аудан хал-қы үшін айтулы, қуаныш. Ілкімді істер мен желкенді жетістіктер, әрине, бас-аяғы үш жылдың ішінде ауданымыздың әлеуетінің артуына бар күш-жігерін жұмсаған аудан әкімі Тұрсынғазы Мүсәпірбековтың бастамасының, ерен еңбегі мен қажыр-қайратының арқасында еңсерілді.
Халыққа есеп беру жиынында алдымен Қарауыл ауылдық округінің әкімі Құсман Берлешов өз есебімен таныстырды. Ауыл әкімінің сөзіне сүйенсек, жылқы жылы ауыз толтырып айтарлықтай жетістіктермен аяқталған. Барлық тапсырмалар мен жоспарлар бо-йынша тиісті жұмыстар атқарылған. Ауыл дамуындағы негізгі көрсеткіштер алдыңғы жылдармен салыстырғанда едәуір өскен. Аудан орталығы болып саналатын ауылдың ажары артып, көркейе түскен.
Келесі кезекте аудан әкімі Тұрсынғазы Мүсәпірбеков сөз алып, жиналған қауымға өзінің кең көлемді есебін ұсынды.Еліміздің Президенті Н. Ә. Назарбаевтың 2015 жылға арнаған Қазақстан халқына жолдаған «Нұрлы жол — болашаққа бастар жол» атты жолдауынан туындайтын 7 бағыттың бірі көлік-логистикалық инфрақұрылымдарды дамыту жайын айтып, ауданның әлеуметтік-экономикалық дамуының негізгі бағыттары бойынша қол жеткен жетістіктері жайында ақпар беріп, көптеген мәселелерді қамтыған есебімен та-ныстырды.
— Төскейінде төрт түлік малы өрбіген өңірімізде өткен жылы мал басы өсіп, мал өнімдерін өндіру дұрыс жолға қойылды. Осындай жұмыстардың оң нәтижесінде ауданда қой мен ешкі 334 164 басқа, ірі қара 48 871 басқа, жылқы малы 28 277 басқа жетіп отыр. Болашақта өндірілген қымызды тиімді тәсілдер бойынша сатуға қол жеткіземіз. Бұл ретте Татарстан республикасының қымыз сатудағы озық өнегесі бізге үлгі болмақ,- деп атап өтті өз сөзінде Тұрсынғазы Жантұяқұлы.
Жиында аудан әкімі ауыл шаруашылығын дамыту бағыты төңірегінде, “Ақбұлақ”, “Сыбаға”, “Жайлау” бағдарламаларының орындалу барысы жайлы, субси-дияларды игеру, денсаулық сақтау, білім, спорт, жұмыспен қамту, тірек ауылдарды дамыту, қылмысты тізгіндеу мәселелері жайлы баяндап, қол жеткен толағай табыстарды да көпшілік назарына ұсынып, өз ойын слайд арқылы сабақтап отырды. Болашақтың еншісіндегі бірқатар жоспарларды да ортаға салды. Сондай-ақ, Қазақ хандығының 550 жылдығы, ұлы Абайдың 170 жылдығы, Қазақстан халықтары ассамблеясының 20 жылдығы, ұлы Жеңістің 70 жылдық торқалы тойлары аудан көлемінде өткізілетін барлық қоғамдық- саяси, мәдени іс — шаралардың негізгі арқауы болмақ. Ел тарихының ең бір айтулы мерейтойларын лайықты деңгейде атап өту елдігімізге сын болатындығын баса айтты аудан әкімі.
Мәнді өрбіген кездесуде М. Түңлікбаев, М. Мұқанов, Н. Бұланбаевалар жарыссөзге шығып, өнердің өркендеуі, спорттың дамуы және жергілікті майдангерлер туралы кітап шығатындығы жайлы айтты. Қарауыл ауылының тұрғындары Ш.Несіпбай, М.Магденов, Д. Жолдыбайқызы аудан басшысына өз өтініш-тілектерін жолдады. Жиын соңында аудан әкімі Т. Мүсәпірбеков қойылған сауалдар мен жолданған өтініш-тілектердің барлығына жауап қайтарып, түйткілді мәселелердің назарда болатындығын айтты.
Бұлбұл ӘНУАРБЕКҚЫЗЫ,
«Семей таңы»
