Семей қалалық ақпарат орталығында ШҚО денсаулық сақтау басқармасының Семей аймағы бойынша бөлімшесінің ұйымдастыруымен ана мен бала өмірін қорғау мәселесіне байланысты баспасөз мәслихаты өтті.
{jcomments on}Шараға қаладағы денсаулық саласының жетекші мамандары, перинаталдық орталықтардың бірінші басшылары қатысты. Мамандардың айтуынша, өткен жылы қала бойынша жалпы өлім-жітім деңгейі төмендеген.
Жиында алғашқы болып сөз алған қаламыздың бас акушер-гинекологы Венера Аукенова ана мен балаға қатысты бірқатар мәліметтерімен бөлісті.
— Өткен жылы қаламызда 6580 бала дүниеге келді. Яғни бұл 2013 жылмен салыстырғанда туу көрсеткішінің артқандығын байқатады. Жалпы, ана мен бала үшін елімізде, қаламызда барлық жағдай жасалған. Арнайы медициналық көмек қажет жүкті әйелдерге қала деңгейінде, облыс деңгейінде, қажет болғанда, республикалық деңгейде Астана қаласындағы «Ана мен бала» орталығында көмек көрсетіледі. Қазіргі таңда біз болашақ аналарды ерте кезеңде тіркеуге алу мәселесімен айналысудамыз. 12 аптаға дейін тіркеуге тұру жүкті әйелге кешенді тексеріліп, өмірге дені сау ұрпақ әкелуге, ұрықтың дамуында генетикалық ақау болған жағдайда, уақтылы анықтауға мүмкіндік береді,- деген Венера Махмұтқызы алғашқы медико-санитарлық көмек көрсету өз деңгейінде жүргізілетіндігін, медицина қызметкерлері ғана емес, болашақ аналар да өз жауапкершіліктерін сезінгені жөн екендігін тілге тиек етті. Сонымен қатар жүктілік кезінде дәрі-дәрмек қабылдау көлемін шектеу қажеттігін ескере отырып, созылмалы аурулары бар болашақ аналар жүктілікті жоспарламас бұрын ем жүргізсе, жүктілік кезеңі ойдағыдай өтетіндігін және ананың дерттері шаранасына берілмеу мүмкіндігінің зор болатындығын жеткізді.
Жыл санап туу көрсеткіші жақсарып келе жатқанын тілге тиек еткен қаланың бас педиаторы Сарқыт Шабданова статистикалық деректерге кезек берді.
— Соңғы үш жылда қаламызда медико-демографиялық жағдай оң нәтижесін көрсетуде. 2012 жылы 6112 бала туылса, 2014 жылы 468 балаға артқан. Бір сөзбен айтқанда, туу көрсеткіші жыл санап өсіп келеді. Соңғы үш жылда туу көрсеткіші артқан сайын, 13,8 пайыздан 11,2 пайызға шарана өлімінің азаюы да — саладағы жетістік,- дей келе, С.Шабданова статистикалық көрсеткіштердің жақсаруы денсаулық саласына қатысты қабылданған «Саламатты Қазақстан» сынды өзге де бағдарламалардың қаламыздағы медициналық мекемелерде нәтижелі жүзеге асырылғандығының айғағы екенін айтты.
Баспасөз мәслихаты барысында ана мен бала өмірін қорғауға байланысты тағы бірқатар мәселелер талқыланды. Басты мақсат , Елбасының Жолдауына сай, халықтың өмір сүру жасын ұзарту үшін кешенді түрде жұмыс жасау, алғашқы медициналық-санитарлық көмек арқылы аурудың алдын алу. Сонымен қатар бәсекеге қабілетті дамыған елдерде ана мен бала өлімі болмайтындығын тілге тиек еткен облыс әкімінің тапсырмасын жүзеге асыру ақ халатты абзал жандардың мүддесі болып отыр.
Әйгерім СӘРСЕНҒАЛИ,
«Семей таңы»
