Қала әкімінің орынбасары Зәуреш Исабаеваның жетекшілік етуімен Семей қаласы әкімдігінің жанындағы кәмелетке толмағандардың істері және олардың құқығын қорғау жөніндегі комиссияның отырысы өтті.
{jcomments on}Жоспарлы түрде өткізіліп отыратын отырыстың негізгі мақсаты – кәмелеттік жасқа толмағандар арасындағы маскүнемдік пен нашақорлыққа бой алдырудың алдын алу бойынша уәкілетті органдардың жұмысын күшейтіп, бала тәрбиесімен айналысуға құлықсыз ата-аналардың тәртібін қадағалау.
Бұл жолғы отырыста отызға жуық іс қаралды. Оның ішінде бала тәрбиесіне селқос қараған ата-аналар мен тәртібі нашар жасөспірімдер өз істері үшін жауап берді. Комиссия мүшелері алдымен ішімдікке салынған 46 жастағы ер адамның ісін қарады. Екі баланың әкесі еш жерде жұмыс жасамайтын көрінеді. Салдарынан кәмелетке толмаған балаларының тәрбиесіне көңіл бөлмей келген. Істі таныстырған Семей қаласы ІІБ Әуезов полиция бөлімінің кәмелеттік жасқа толмағандар істері жөніндегі учаскелік инспекторы азаматтың үстінен көршілері де шағым түсіргенін баяндады. Азаматтық некедегі әйелімен келген ер адам комиссия мүшелеріне ішімдікті қойып, жұмысқа орналасқанын айтып ақталды. Оның сөзін азаматтық некедегі зайыбы да растады. Дегенмен комиссия мүшелері оған қатаң ескерту жасады.
Одан кейін ішімдікке салынған 30 жастағы әйел адамның ісі қаралды. Отырыс барысында белгілі болғандай, 1 жастағы және 3 айлық баласы бар әйелдің үстінен туған анасы шағымданыпты. Тәртіп сақшыларының айтуынша, жас ана ішімдікке құмартып, балаларының тәрбиесіне көңіл бөлмей, тіпті оларды қараусыз да қалдырып кететін кездері де жиі болып тұратын көрінеді. Ол да ішімдік ішуді доғарғанын айтып, ағынан жарылды. Алайда комиссия мүшелері оған да қатаң ескерту жасады. Егер де мұндай жағдай қайталанатын болса, ата-ана құқығынан айырылатынын жеткізді.
Семей қаласы ІІБ Әуезов полиция бөлімінің кәмелеттік жасқа толмағандар істері жөніндегі учаскелік инспекторы, полиция капитаны Арай Бектұрсынованың сөзіне сүйенсек, сараптамаға сәйкес, өткен жылы сот шешімі бойынша жеті адам ата-ана құқығынан айырылған. Бір ата-анаға түзелуге жарты жыл уақыт берілсе, бес бала арнайы мектепке жіберіліпті.
— Қаңтар айының өзінде 3 азамат ата-ана құқығынан айырылды. Олардың балалары қаладағы уақытша бейімдеу орталығына орналастырылды. Алдағы уақытта олар кімнің қамқорлығына алынатыны шешілетін болады. Ал сабақты жиі босатып жүрген жасөспірімдерді арнайы мектепке жіберу үшін екі іс сотқа жіберілуге әзірленуде. Ол соттың шешіміне байланысты болады. Тәртіпке келтіре алмаған ата-аналары да оларды арнайы мектепке жіберуді өздері сұрап отыр, — дейді Семей қаласы ІІБ Әуезов полиция бөлімінің кәмелеттік жасқа толмағандар істері жөніндегі учаскелік инспекторы, полиция капитаны Арай Бектұрсынова.
Асан МЫРЗАХАНОВ,
«Семей таңы»
