Өткен аптада қалалық әкімдікте көпбалалы аналардың тағы бір легі марапатқа ие болды. Марапаттау рәсіміне қала әкімінің орынбасары Зәуреш Исабаева, қалалық ардагерлер кеңесінің төрағасы Амантай Доғалақов, жұмыспен қамту және әлеуметтік бағдарламалар бөлімі басшысының орынбасары Азамат Құрманғалиев қатысты.
{jcomments on}Елбасы қолтаңбасы қойылған кітапша мен «Күміс алқаларды» Раушан Галиева мен Жанар Мынжанова сынды аналарға табыстаған Зәуреш Исабаева батыр аналар атына жылы лебізін білдірді.
— Әрбір нәзік жандының өмірге бала әкелуі – үлкен ерлік, үлкен қайсарлық, үлкен бақыт. Сіздер сол бақыттың дәмін татып отырсыздар. Әр адам үшін ананың орны бөлек. «Отан отбасынан басталады» деген сөз бар. Еліміздің өркендеуіне, демографиялық өсімге өз үлестеріңізді қосып жатқандарыңыз үшін, ал-ғыс айтамыз. Сіздердің жолдарыңызды кейінгі жастарға берсін. Алдағы өмірлеріңізде тек жақсылық орын алып, дендеріңіз сау болсын. Балаларыңыздың қызығын көріңіздер. Отбасыларыңызға бақыт тілеймін. Шаңырақтарыңыздың іші әрдайым шаттыққа тола берсін, — деген Зәуреш Рамазанқызы қала бойынша 2 мыңнан аса «Алтын алқа» және «Күміс алқа» иегерлері бар екенін айтып өтті. Сонымен қатар елімізде өмірге ұрпақ әкелген аналар үшін барлық жағдайлар жасалып отырғанын да тілге тиек етті.
Марапаттауға қатысып отырған аналарға ризашылығын білдірген жұмыспен қамту және әлеуметтік бағдарламалар бөлімі басшысының орынбасары:
— Бүгінгі марапаттарыңызға байланысты енді сіздерге мемлекет тарапынан 12685 теңге арнайы мемлекеттік жәрдемақы төленеді. Бұл уақытқа дейін төрт балаға алып жүрген жәрдемақыларыңыз жайлы зейнетақы қоры орталығына барып кеңес алыңыздар. Мүмкін болған жағдайда, ол жәрдемақы жұбайларыңыздың атына тіркеліп, жалғаса береді, — деді. Өз кезегінде қалалық Ардагерлер кеңесінің төрағасы Амантай Доғалақов:
— Елбасының атынан құттықтау, мемлекеттік қолдау сіздерге қуаныш сыйлайды деген пікірдеміз. Мемлекетіміз жылдан-жылға әлеуметтік-экономикалық тұрғыдан даму үстінде. Болашақта ұрпақтарыңыздың саны артып жатса, қолдау аясының да кеңейе түсері анық, — деп, аналар қауымына жылы лебізін білдіріп, шаңырақтарына шаттық тіледі.
«Күміс алқаға» ие болған Раушан Галиева мен отағасы Руслан бір қыз, бес ұл балаға әлемнің жарығын сыйлаған. Тұла бойы тұңғыштары 18 жаста болса, кенжелері 1 жаста екен.
— Қуанышымызда шек жоқ. Мемлекет басшысына, қала әкімдігіне алғыс айтамын. Моральдық, материалдық жағынан бізге қолдау көрсетіп жатыр. Десе де әрбір ата-ана өмірге перзентті мемлекеттен қолдау күту үшін емес, өзі үшін әкеледі. Балаларым – бақытым. Олардың қызығы мен қуанышы – біздің байлығымыз. Әр перзентім есейіп, еліміздің өркендеуіне үлес қосса деген тілегім бар, — деген ана, Абай атамыз айтпақшы, ұрпағының әкенің емес, адамның баласы болғандығын қалайтындығын жеткізді.
Ал Жанар Мынжанова — өмірге 2 қыз, 4 ұл бала әкелген ана. Биыл 38 жасқа толып отыр. Тұңғышы 16 жастағы бойжеткен болса, сүт кенжесі — 1 жастан асқан сәби. Марапаттау рәсіміне Жанар Манапқызымен бірге енесі Роза әжей де қатысты. Өмірден көргені мен түйгені мол кейуана келіндеріне «өмірге бала әкелу – әйел адамның парызы, көп бала әкелу – бақыты» деген өнегелі ойымен үнемі бөлісетіндігін жеткізді.
Жиын соңында З.Исабаева: «Бәсекеге қабілетті 30 елдің қатарына қосылуымыз үшін Елбасымыз: «ұрпақтарымыз белсенді, білімді және денсаулығы мықты азаматтар болуы керек»,- деген болатын. Сол білімді, денсаулығы мықты азаматтарды бүгін сіздер тәрбиелеп отырсыздар. Мәңгілік Елдің ұрпақтары мәңгі жасасын»,- деп қорытындылады.
Әйгерім СӘРСЕНҒАЛИ,
«Семей таңы»
