Қалалық әкімдікте ШҚО білім саласының концессиялық жобалары, атап айтқанда, шаһарда бой көтеретін балабақшалар мәселесі қаралды. Жиынға қала әкімінің орынбасары Зәуреш Исабаева және облыстық білім басқармасы басшысының орынбасары Лариса Глазовская, «Мемлекеттік-меншіктік әріптестіктің аймақтық орталығы» АҚ төрайымы Әлия Масакова және кәсіпкерлер қатысты.
{jcomments on}Мамандардың сөзіне сүйенсек, бүгінгі таңда қалада 33 мектепке дейінгі мекеме, 50 шағын орталық бар болса, жасқа толмаған сәбилер мен үш жас аралығындағы 12 мыңға жуық бүлдіршін балабақшаға кезекте тұрған көрінеді.
— Өткен жылы қаламызда 252 орынға арналған 4 жекеменшік балабақша, 75 орынға арнал-ған шағын орталық ашылды. Тағы 14 мектепке дейінгі мекемеге 1782 орынға мемлекеттік тапсырыс бердік. Мектепке дейінгі мекемелердің тапшылығы, бір жағынан, мемлекет меншігіндегі балабақша ғимараттарының жоқтығымен, екіншіден, жыл санап бала санының артуымен байланысты, — деді Зәуреш Исабаева.
Мәселені шешу үшін биыл мемлекеттік-жекеменшік серіктестік аясында 5 балабақша салынбақ. Балабақшалар құрылысы 2 млрд. 639 млн. теңгеге жоспарланып отыр. Қаржыландыру көзіне келсек, құрылыс кезеңінде инвестор 10% өз қаражатын құйса, қалған 90 пайызды заемдік қаржы ретінде мемлекеттен ала алады екен.
— Семей қаласында 1290 орынға арналған 5 балабақша салу көздеуде. Құрылыс кезеңі 10 айға жоспарланып отыр. Құны 2 млрд. 639 млн. теңгені құрайды, — деді Әлия Масакова.
Жоспар бойынша Жангелдин көшесінде 320 орындық, Энергетик ықшам ауданында 280 орындық, Глинка көшесінде 140 орындық, Дачная көшесінде 320 орындық және Рудная көшесінде 230 орындық балабақша бой көтермек. Балабақша орындарымен қатар, құрылыс жоспарлары және құрылысты өз жауапкершілігіне алатын мердігерлердің міндеттері мен мүмкіндіктері жиын барысында кеңінен талқыланды. Сонымен қатар жиын барысында концессиялық әдістің тиімділігі мен ұтымды тұстары да сөз болды. Кәсіпкерлер өз кезектерінде облыстан келген мамандарға сауалдарын жолдап, тиісті жауаптар қайтарылды.
Әйгерім СӘРСЕНҒАЛИ,
«Семей таңы»
