Өткен аптада Жарма ауданында «Қазақстан Студенттерінің Альянсы» РСҚ Шығыс Қазақстан облысы бойынша өкілдерімен кездесу өтіп, жүздесу аясында ұйымның Жарма ауданындағы филиалы құрылды.
{jcomments on}Бұған дейін Үржар, Аягөз аудандарында жастармен кездесу ұйымдастырған арнайы топтың негізгі мақсаты – қазіргі таңда республика көлемінде 4 мыңға жуық мүшесі бар ұйымның тыныс-тіршілігімен жастарды таныстыру, аудандарда Студенттер Альянсының филиалдарын ашу.
Альянстықтардың Жармадағы жүздесуі аудандық Жастар үйінде өтті. Оған мектеп оқушылары мен жармалық жастар қатысты. Кездесуде аудандық ішкі саясат бөлімінің бас маманы Аманжол Кикбаев шараның маңызы мен мақсатына тоқталып, кіріспе сөз сөйледі.
Алғашқы танысудан соң арнайы топ мүшелері ұйымның бүгінгі сәтке дейін облыс көлемінде ұйымдастырған маңызды және ауқымды іс-шаралары жайында бейнеролик көрсетіп, көпшілік шараларды қалай ұйымдастыру керектігін, іс-шараның маңыздылығын ескере отырып, демеушілерді тарту, дебат клубтарының жұмысын жандандыру жолдарын түсіндірді. Республика көлемінде көптеген оқу орындарын қамтып отырған ұйымның жұмысындағы тағы бір ерекшелік — өздерінің өткізетін шараларына Қазақстанның өнер жұлдыздарын, қоғамдағы әр саланың қызметкерлерін белсене араласуға шақырулары екендігін тілге тиек етті, жастардың өмірлік бағыт-бағдарын айқындап, өз жолдарын табуларына ықпал ететіндіктеріне тоқталды.
Кездесу барысында ұйымның атқарған жұмыс нәтижелеріне қарап, альянстықтар тек мәдени шараларды ғана емес, рухани, сауабы мол игі істерге де мұрындық болатындықтарына көз жеткіздік. Атап айтсақ, «жетім көрсең, жебей жүр» деген халық даналығын әрдайым есте сақтаған жастардың Семей қаласындағы балалар үйінде өткізген игі шарасы көпшіліктен қолдау тапқаны анық.
Шара аясында ағымдағы жылы Семей қаласында Студенттер Альянсының слеті өтетіндігі айтылды. Бұл мәлімет оқушыларды қызықтыра түсті. Ұйым жұмысына қызығушылық танытқан кездесуге қатысушылар сауалдарын жолдап, жауап алды.
Жүздесу соңында аудан бойынша аталған ұйымның бөлімшесі құрылып, оның мүшелері тағайындалды. Филиал басшысының міндетін уақытша атқару В.Маяковский атындағы орта мектептің 11 сынып оқушысы Аяулым Тургамбаеваға, ал көмекшісі қызметі аталған мектептің оқушысы Нурмухамбет Калиевке тапсырылды.
Ел ертеңі саналатын жастардың қоғамдық өзгерістер мен мемлекеттік жастар саясатын дамытуға деген көзқарастары жиын барысында анық байқалды. Өз өмірін Қазақ Елінің ертеңімен сабақтастыра білетін әрбір қазақстандықтың шынайы патриот болуы осы сәттен басталарына кәміл сенеміз.
Аманжол КИКБАЕВ,
Жарма аудандық ішкі саясат
бөлімінің бас маманы.
