{jcomments on}Жуырда Үкіметтің кеңейтілген отырысы өтіп, болашақтың даму жоспары тағы бір мәрте сараланды. Қандай жағдай болмасын, халықтың тұрмысын тұралатпауды мақсат еткен Мемлекет басшысының Үкіметке, әкімдерге, халыққа берген тапсырмалары көңілімізге қуаныш ұялатты. Президентіміз қазіргі экономикалық ахуалды ескеріп, «Нұрлы жол» бағдарламасын әлемдік экономикалық дағдарысқа қарсы жаңа шаралармен толықтыру арқылы қолдау аясын кеңейткен жөн екендігін атап өтті. Ұлттық қордан қаржы бөлінетіндігін, әлеуметтік сала жандана түсетіндігін айтып, білім беруді және денсаулық сақтауды жаңғырту жұмыстарын жалғастыру қажеттігіне тоқталды.
«Бұл – болашақ экономикалық өсімге негіз қалауға мүмкіндік беретін адам капиталына салынатын ұзақмерзімді инвестиция. Білім беру саласында «Балапан» бағдарламасын жүзеге асыруды, орта білім бойынша жан басына қаржыландыру тәртібіне көшуді және 12 жылдық білім беру моделіне біртіндеп өтуді жалғастыру қажет», – деді Мемлекет басшысы.
Сонымен қатар Н.Ә.Назарбаев 2015 жылы Индустрияландыру картасы жобаларын жүзеге асырудың жалғасатынын айтты, оның аясында сомасы 600 миллиард теңгеден асатын 7,5 мыңнан астам тұрақты жұмыс орындарын ашуға мүмкіндік беретін 75-тей жобаны іске қосу жоспарланғандығын жеткізді. Жұмыс орындары қысқармай, жұмыссыздық деңгейі төмендесе, дағдарыс лебі сезілмейді деп ойлаймын. Ауданымызда ауылшаруашылығы өнімдерін өндіруге қолайлы жағдайлар жасалған. Ауылшаруашылығы өнімдерімен өзімізді толықтай қамтып, шетелге Қазақстанда жасалған өнімдерді ұсынсақ, әлеуметтік-экономикалық тұрғыдан жетістікке жетеріміз анық. Мемлекет басшысы жүйелі жоспар ұсынды, оны жүзеге асыру барша халықтың міндеті деп білемін.
Нұрланбек САНДЫБАЕВ,
Үржар аудандық Ардагерлер
ұйымының төрағасы.
