Абай ауданының «Айгөлек» балалар ән—би ансамблі гастрольдік сапармен Семейге келді. Ұлылар елінің өрелі өрендерінің өнерін тамашалау үшін Абай театрында өткен концертке қала жұрты көптеп жиналды.
{jcomments on}Абай ауданы қашан да өнер мен әдебиеттің, мәдениеттің кіндігі саналған. Тарихқа көз жүгіртсек, 1980-1990 жылдары аудандық «Балдәурен» балалар ансамблі Германияға барып қазақ өнерін паш еткен екен. Кейіннен штаттың қысқаруына байланысты өнер ұжымы таратылған. Десе де «бұлақтың көзін ашатын» аудандық «Жауқазын», «Ақбота», «Жас керуен», «Жас қанат» сияқты өнер байқаулары жыл сайын ұйымдастырылған. Тіпті Шара апаларының жолын қуған «Өрнек» бишілер тобы республикалық «Айгөлек» байқауынан жүлделі орын алып, Абай елінің атын асқақтатып қайтқан. Бұл жетістіктерді ескерген аудан басшылығы ансамбль құруға тапсырма беріп, нәтижесінде Тұрсынғазы Жантұяқұлының қолдауымен ансамбль жұмыс жасауда. Ұжымға жетекшілік ету өнер саласында 40 жылдан астам тәжірибесі бар ҚР-ның мәдениет қайраткері Нағия Бұланбаеваға жүктелген екен.
— Абай ауданында ұлттық дәстүрді, көркемөнерпаздар шығармашылығын дамыту, аудан тұрғындарының демалысы мен бос уақытын сәнді де мәнді өткізуде ерекше белсенділік танытып жүрген «Қаламқас» халық ән-би ансамблі бар. «Айгөлек» — сол «Қаламқастың» сіңлісіндей балғындардың талантын танытуға, өнерге баулуға жол ашатын балалар ұжымы. Жалпы, ансамбльдің құрылғаннан бері бірінші рет гастрольге шығып, үлкен концерт беріп отырған жайы бар. Өнердегі алғашқы қадамымызды киелі Семей топырағында, Абай театрынан бастауымыздың да мәні бар. Мұндағы мақсатымыз – өнерсүйер қауымның, талантты тарландардың, жалпы халықтың батасын алу, — деп атап өтті Нағия Бұланбаева.
Бұл бастаманы Абай Құнанбайұлының 170 жылдық мерейтойымен байланыстырған Семей қалалық мәдениет және тілдерді дамыту бөлімінің басшысы Берік Көпбаев ансамбль ұжымына шығармашылық табыс тіледі.
Абай атындағы театр залында ине шаншар орын болмады. Балғындардың бір тобы тыңдармандарын «Қазақ елі», «Семейім», «Атамекен толғауы» сынды әсем әндерімен әуелетсе, мың бұралған бишілер де көркем билерімен көпшілікті тәнті етті. Ал қос ішектен күй күмбірлеткен балалар көрерменді тамсандырмай қоймады. Жас өнерпаздарға тәнті болған көпшілік концерт соңында кішкентай өнер иелеріне риясыз ризашылықтарын айтып, ақ баталарын берді. Қазақтың өнерін насихаттап, төрткүл әлемге танытуға тілектестік білдірді.
Әйгерім СӘРСЕНҒАЛИ,
«Семей таңы»
