Өткен жұма күні Өскемен қаласының Металлургтер мәдениет сарайында Шығыс Қазақстан облысының әкімі Даниал Ахметовтің өңір халқымен есепті кездесуі өтті.
{jcomments on}Облыс әкімінің есептік кездесуіне, өңір халқымен бірге, Қазақстан Республикасының ішкі істер министрі Қалмұханбет Қасымов, Шығыс Қазақстан облысынан Қазақстан Республикасының Парламент Сенатының депутаты Талғатбек Абайділдин, Қазақстан Республикасының Парламент Мәжілісінің депутаты Виктор Киянский қатысты.
Есепті кездесудің басында Даниал Ахметов Қазақстан Республикасының Президенті Н.Назарбаевтың «Нұрлы Жол – болашаққа бастар жол» атты Жолдауында белгіленген тапсырма аясында атқарылған жұмыстарға тоқталды.
— «Нұрлы Жол» – бұл елімізді көшбасшылыққа бастайтын «қазақстандық даму жолы». Мемлекет басшысы атқарылатын барлық шаруаға үлкен жауапкершілікпен қарауды тапсырды. Жаңа экономикалық Саясаттың инвестициялық жобаларын іске асыруда нақты нәтижелерге қол жеткізуіміз керек. 2014 жылдың қорытындысы бойынша, экономикалық кедергілерге қарамастан, Шығыс Қазақстан негізгі стратегиялық мақсаттарды табысты жүзеге асырды, — деді Д.Ахметов.
Аймақ басшысы өткен жылдың қорытындысы бойынша облыстың жалпы өңірлік өнімінің (ЖӨӨ) тұрақты өсімін айтып өтті. Экономиканың базалық салаларын дамыту есебінен Шығыс Қазақстанның ЖӨӨ-і 2,2 трлн. теңгеге жеткен. Бұл көрсеткіш, макроэкономикалық өсіммен, 2013 жылмен салыстырғанда 2,5 %-ға артық.
— 2014 жылы өнеркәсіп кәсіпорындары 2013 жылмен салыстырғанда, 10% өсіммен, 1098 млрд. теңгенің өнімін шығарды. Тау-кен байыту өнеркәсібінің көлемі, 6,2 % өсіммен, 102,5 млрд. теңгеге жетті. Өнеркәсіп өнімдерінің негізгі үлесін (83,1%) өңдеу өнеркәсібі құраса, 2014 жылға ішкі сала өндірісінің көлемі 10,2 %-ға артты, — деді Д.Ахметов.
Есептік кездесуде белгілі болғандай, жұмыссыздық деңгейі өткен жылы 4,8 %-ды (2013 жылы 5,1 %) құрап, өңірде әр салада 20,2 мың жұмыс орны ашылған. Д.Ахметовтің айтуынша, аймақта жұмыссыздық деңгейін төмендету үшін 2015 жылы «Жұмыспен қамтудың жол картасы – 2020» бағдарламасын іске асыруға 11 млрд. теңге жұмылдырылмақ.
ШҚО әкімі Даниал Ахметов халық алдында өткізген есептік кездесуде өңірлік инновациялық өнімнің бестен бірі Шығыс Қазақстанда өндірілетінін мәлімдеді.
Есептік кездесуде аймақ басшысы мәлімдегендей, соңғы 2 жылда өңірлік жалпы өнім құрылымындағы инновациялық өнім 2,5 есеге өсіп, өткен жылы өнім көлемі 109,4 млрд. теңгеге артқан. Бүгінгі күні облыс аумағында «Қазмырыш» ЖШС, «Үлбі металлургиялық зауыты» АҚ, «Өскемен титан-магний комбинаты» АҚ, «АЕS Өскемен ЖЭО» АҚ, «Согрин ЖЭС», «Семей қаласының цемент зауыты», «Азия Авто» АҚ сынды 75 мың адам жұмыс істейтін ірі кәсіпорындар өткен жылы 1 трлн. 98 млрд. теңгенің өнімін өндірген. Бұл көрсеткіш 2013 жылмен салыстырғанда 100 млрд. теңгеге артық.
Сонымен қатар, жүйеқұрастырушы кәсіпорындардың тауарды сатып алу, жұмысы мен қызметі 257 млрд. теңгені құрап, соның ішінде жергілікті қамтудың үлесі 120 млрд. теңгеге жеткен.
— Облыстың тауар өндірушілерінен ұлттық компаниялармен сатып алу көлемі 2013 жылғы деңгейден 1,7 есеге артып, 93 млрд. теңгені құрады, келісімшарттар саны 30%-ға артты. Аймағымыздағы ірі кәсіпорындар мен отандық тауар өндірушілердің серіктестігі арқасында өңіріміздің экономикалық тұрақтылығын қамтамасыз етеміз, — деді Д.Ахметов.
Облыс басшысының халық алдындағы есептік кездесуі барысында Даниал Кенжетайұлына өңір тұрғындары тарапынан көптеген сұрақтар қойылып, тиісті жауаптар қайтарылды.
ШҚО ақпарат орталығы.
