Бесқарағай ауданының тілдерді оқыту орталығы мемлекеттік тілді насихаттау мақсатында жоспар бойынша іс-шараларды ай сайын дәстүрлі түрде ұйымдастырып тұрады. Оқыту орталығының әрбір қызметкері өзін осы орталықтың бір бөлігі болып сезінуі — қуантарлық жағдай. Осындай бір тамаша көңіл күйде мекемелер мен ұйымдардың басшылары және мемлекеттік қызметшілері арасында «Маржан сөз» атты «Ғажайып алаң» («Поле чудес») ойыны өтті. «Ғажайып алаңды» оқыту орталығының әдіскер-мұғалімі Әменова Айнаш Әлібекқызы жүргізді.
{jcomments on}Бұл шара Қазақстан халқы Ассамблеясының 20 жылдық мерейтойы, Жеңістің 70 жылдығы, ҚР Конституциясына 20 жыл, Қазақ хандығының 550 жылдығы, Ұлы Абайдың 170 жылдық мерейтойларына арналды.
«Ғажайып алаң» ойыны ауданда бірінші рет өткізілді. Ойынды өткізудегі мақсат — ауданның мекемелері мен ұйымдарының басшылары және мемлекеттік қызметшілердің мемлекеттік тілге құрметі және еліміздің өткен тарихы мен мәдениеті жайында сөз қозғау.
І кезеңнің ойыншылары аудан әкімі аппаратының ұйымдастыру – инспекторлық және мемлекеттік-құқық жұмысы бөлімінің басшысы Р.Қисамиева, әділет басқармасының бас маманы А.Иманғалиева, құрылыс бөлімінің іс жүргізушісі Қ.Тоқтағазина болды. І кезеңнің сұрағына мүдірмей жауап берген Р.Қисамиева жеңімпаз атанды.
Ал ІІ кезеңде аудан әкімі аппаратының кадр және персоналды басқару бөлімінің басшысы А.Миятова, жұмыспен қамту және әлеуметтік бағдарламалар бөлімінің басшысы Б.Баталов және ішкі саясат, мәдениет және тілдерді дамыту бөлімінің жетекші маманы А.Солтанғазин ойынды жалғастырып, аса тапқырлықпен жауап берген, жылдамдықпен жауап берген Б.Баталов жеңімпаз атанды. Сондай-ақ 3 әріпті тапқан ойыншыға ақшалай сыйлық беріліп, ойыншылардың қызыға ойнауына үлкен септігін тигізді. Ал білім беру бөлімінің әдіскері М.Махамбетова, ТҮКШ, жолаушылар көлігі және автомобиль жолдары бөлімінің іс жүргізушісі Т.Ильяшева, Бесқарағай колледжінің оқытушысы Б.Кабаева ІІІ кезеңнің ойыншылары атанып, бұл кезеңде Б.Кабаева белсенділік танытып, жеңіске жетті. Ойынға қатысушылар сыйлықтармен марапатталды. Сол сияқты көрермендердің ішінен шапшандық танытып, сұраққа бірінші болып жауап берген жұмыспен қамту бөлімінен Қанағат Қожахметов те сыйлыққа ие болды. Ал ІV кезеңде ҚР Конституциясы жайлы сұрақ қойылып, ақтық ойынға Р.Қисамиева шықты. Берілген минутын сәтті пайдалана білген ойыншы Руфия Ноғайшынқызы бұл сыннан да сүрінбей өтіп, «Супер — ойында» жеңімпаз атанды. Жеңімпазға мақтау қағазы мен бағалы сыйлық табыс етілді.
«Ғажайып алаң» ойыны барлық қатысушылар мен көрерменнің көңілінен шығып, өте тартымды өтті. Сондай-ақ басшылар тарапынан 8 Наурыз мейрамы қарсаңында мекемелер мен ұйымдардағы әйелдер қауымымен де «Ғажайып алаң» ойынын өткізу туралы ұсыныс түсті. Осы ұсыныс қабыл алынып, ойынды өзгеше өткізу жоспарда.
Ү. МИРАШЕВА,
Оқыту орталығының директоры,
Бесқарағай ауданы.
