Бүгінгі таңда жүз отыз ұлттың баласын бауырына басып отырған Қазақстанды киелі мекен, алтын бесік десек, артық емес-ті. Осыдан жиырма жыл бұрын Елбасы Н.Назарбаевтың бастамасымен Қазақстан халқы Ассамблеясы негізін қалады. Биыл аталған Ассамблеяның жиырма жылдығы, 2015 жыл – Ассамблея жылы. Сондықтан да Ассамблея жылы аясында жоспарланған негізгі іс-шараларға сәйкес, Жарма ауданының орталығы Қалбатау ауылында Мәдениет үйінің ғимаратынан «Аудандық келісім орталығы» ашылды.
{jcomments on}Аталған шараның ашылу салтанатына Шығыс Қазақстан облысы бойынша Қазақстан халқы Ассамблеясы төрағасының орынбасары Еркін Аябзаев, аудан әкімі Әнуәрбек Мұхтарханов, аудандағы этномәдени топ өкілдері, мекемелер мен бөлім басшылары, мектеп оқушылары, ауыл тұрғындары қатысты.
Алғашқы құттықтау сөз кезегін алған аудан әкімі Ә.Мұхтарханов аудандағы саяси тұрақтылық, ұлттар мен ұлыстар арасындағы татулық, ауызбіршіліктің негізі саналатын Ассамблея жұмысына кеңінен тоқталып өтті. Сонымен қатар бірнеше жыл бұрын негізін қалаған Славян халықтарының «Единство», неміс халқының «Айн хайт» және шешен ұлтының «Бард» сынды этномәдени топтарының басын бір арнаға біріктіретін келісім орталығының жұмысына сәттілік тіледі.
ШҚО ҚХА хатшылығының меңгерушісі Е.Аязбаев биыл өзінің 20 жылдығын атап өткелі отырған Қазақстан халқы Ассамблеясының негізгі жұмыстарына, бүгінгі таңға дейін жеткен жетістіктеріне, алдағы мақсат-міндеттеріне кеңінен тоқталды.
Татулықты тірек еткен, алдағы уақытта қоғам игілігі үшін маңызды іс-шараларды атқаруға негіз болатын қоғамдық келісім орталығының меңгерушісі ретінде этномәдени топ өкілі Татьяна Пяткова тағайындалды. Іс-шара Славян халықтарының негізгі салт-дәстүрі ретінде «Каравай» нанын ұсынумен, ақ жаулықты әжелеріміздің шашу шашуымен басталды. Орталықтың іші этномәдени топ өкілдерінің қолөнер бұйымдарымен безендірілсе, ШҚО бойынша Қазақстан халқы Ассамблеясы төрағасының орынбасары орталыққа тарту ретінде арнайы әкелген достық пен татулық тақырыбындағы кітаптар мен журналдар кабинет сөрелерін толықтыра түсті.
Аманжол КИКБАЕВ,
Жарма аудандық ішкі саясат бөлімінің бас маманы.
