Жақында аудандық орталық ауруханға жүрек-қан тамырлары сырқаттарын дұрыс анықтап, сауатты диагноз қоя білуде таптырмас көмекші болатын заманауи ЭКГ құрылғысы орнатылды. Біраз жылдар бұрын өзінің еңбек жолын аудандық ауруханадан бастаған, бүгінгі таңда Алматы қаласында дәрігерлік қызмет жасайтын медицина ғылымдарының кандидаты, дәрігер кардио-хирург Нұрлан Серіков Қарауылға арнайы келіп, аталмыш ЭКГ аппаратын құрып берді.
{jcomments on}Аудандық орталық аурухананың емхана меңгерушісі Майра Қожақова:
— Бұл заманауи аппарат «Интернет-ЭКГ» деп аталады. Науқастың ЭКГ жазбасы интернет арқылы Алматы қаласындағы Сызғанов атындағы кардиологиялық орталыққа жіберіледі. Білікті дәрігерлер айналасы екі минуттың ішінде жазба қорытындысын кері қарай жолдайды. Аталмыш аппараттың, диагностикалық тұрғыдан қиындықтар туындағанда, клиникалық жағынан алғандағы денсаулық жағдайы күрделірек науқастарға дұрыс диагноз қоя білудегі тиімділігі өте зор, — деп, оның ауыл халқының денсаулығын сақтай білудегі маңыздылығын айтып, пікірін білдірді.
Қолға алып жүруге ыңғайлы құрылғының аурудың алғашқы белгілерін нақты анықтай білудегі маңызы ерекше. Оның тағы бір басымдығы — іске қосу үшін арнайы дәрігер маманның көмегі қажет емес. Мысалы, ЭКГ жазбасы алыстағы елдімекенде жасалса да, ол Алматыға аталмыш кардиологиялық орталыққа жөнелтіледі. Тек ЭКГ көрсеткіші ғаламтор желісі арқылы жіберілуі тиіс. Қалай десек те, таптырмас бұл заманауи құрылғы — ел игілігі үшін жасалған жаңалықтың жаршысы, инновация игілігі.
Бұлбұл ӘНУАРБЕКҚЫЗЫ,
«Семей таңы»
