Оқу жылының ішінде мектептердегі балаларға берілетін бір стақан үшін облыс, аудан бюджетінен қомақты қаржы бөлініп сыртқа кетеді. ШҚО әкімі Даниал Ахметов бұдан былай сүт өндіруді батыл қолға алу жөнінде аудандарға тапсырма беріп, сүтті өз өңірімізде өндіруді алға қойған болатын.
Бүгінде аудан әкімі Серік Зайнулдин бұл мәселеге айрықша көңіл бөлуде. Келешекте екі-үш жерде сүт фермаларын ашу, тұрғындардан тұрақты түрде сүт жинауды {jcomments on}ұйымдастыру жұмыстары күн тәртібіне қойылған. Он үш мыңға тарта тұрғыны бар Мақаншы ауылында сүт фермасын ашу қолға алынып, оны кәсіпкер Марат Тышамбеков жүзеге асыруға батыл қадам жасауда. Қазіргі уақытта бұл жұмыспен Қытай Халық Республикасынан келген қандасымыз Нығмет Қайролла айналысуда. Мақаншы коммуналдық – шаруашылық кәсіпорыны территориясының ішінде орналасқан ғимраттың іші қызу еңбекке толы. Тәжірибелі дәнекерлеуші Серғазы Шынтеміровтің жұмысы тіптен көп. Серғазыдан басқа мұнда Мұқият Салықұлы, Әсет Мұқанұлы, Серік Мұқатайұлы, Мақсат Әсенұлы деген азаматтар құлшына еңбек ету үстінде. Мұндағы сүт жинайтын орынды талапқа сай әзірлеу үшін бірнеше адамның жұмыс тауып, жанұясын асырап отырғаны қуантарлық жағдай.
— Көктемде Мақаншы ауылынан бірнеше сауын сиыр табыны шығады. Сол табындағы сиырлардан сауылған сүтті жинап алып, өңдеп, қайта тұрғындарға ұсыну жөніндегі аудан әкімі Серік Зинабекұлынан тапсырма алысымен мен бірден Нығметпен әңгіме өткіздім. Өзін іскер азамат ретінде бұрыннан танып, біліп жүрген болатынмын. Екеуара әңгімеден соң ол бірден осы істі қолға алуға келісімін берді, — дейді ауыл әкімі Совет Тоғанбайұлы.
Нығмет Қайроллаұлымен де тілдесудің реті келген еді.
— Мен мал шаруашылығымен көрші мемлекетте тұрғанда айналысып, сүт фермасында жұмыс істеген болатынмын. Сондықтан бұл жұмыс маған таныс. Әзірше өз қаражатыма осы жерде шаруаны жүргізудемін, — деп, дәнекерленіп жатқан жерді көрсеткен Нығмет,- сыйымдылығы 3 тонналық екі мұздатқыш ыдыс қоямын. Жұрттан сатып алған сүттің майлылығы 3,6-дан кем болмауы керек. Қабылданған сүтті микробтарынан арылту үшін сүт осы мұздатқыштарға құйылады. Одан әрі дайын өнім алу үшін арнайы станоктар орнатылады. Ғимараттың өн бойына қыста жылы болуы үшін құбырлар тартылып, шойын батареялар қойылды. Керекті жабықтардың бәрі көрші мемлекетте сатылымда тұр, тек бөлінген несие тезірек қолға тисе, жұмысты бастап кетуге мол мүмкіндік туар еді. Жиналған сүтті өңдеп, таза қалпында арнайы тетро пакеттерге құйып, елге ұсынсақ деп отырмыз, — дейді.
Нығмет Қайроллаұлы қалдықсыз технологияны іске асыра отырып, кілегей, айран, ірімшік, сүзбе, құрт сияқты ұлттық тағам түрлерін шығармақ. Қазақстанда жасалған осы өнімдерді алушылардың қатары да көбейтініне оның сенімі зор. Игі мақсатты ойдағыдай жүзеге асыру үшін қазір мұнда қарбалас жұмыс жүргізілуде. Ауыл әкімшілігіне жақын жерде орналасқан жаңа жұмыс орнында ауыл әкімі Совет Қалиев те жиі болып, жұмыс барысын қадағалап, ақыл-кеңесін беріп тұрады.
Мұратқазы САЯБАЕВ,
Мақаншы ауылы, Үржар ауданы.
