Тазалық — саулық кепілі. Олай болса, ауланы, елдімекендерді, көшелерді уақтылы тазалап отыру, орын алған кемшіліктерді дер кезінде жою — кезек күттірмейтін шаруа. Бұл жұмыстар әсіресе күн жылынып, қар ерігенде, күшейе түседі. Бұл тұрғыдан алғанда қазір Семейдің коммуналдық қызметтерінің жұмысы қауырт. Қар шығару және құм шашу, қар суынан жиналған ағын суларды сору, кәріздерді тазарту коммуналдық мекемелердің негізгі жұмыстары болып отыр.
{jcomments on}Өткен жұмада шаһарда жауған дымқыл қар коммуналдық қызметтердің жұмысын күшейте түсті. Дегенмен Семей қалалық ТҮКШ бөлімі толыққанды жұмыс күші мен техникасын қолданып, қала көшелерін тазартуды жүйелі түрде ұйымдастыра білді. Тәуліктің 24 сағатында үзіліссіз жұмыс атқарудың нәтижесінде қала көшелері қардан толық тазартылды. Енді сала мамандары көшелерге жиналып қалған еріген қар суларын тарту жұмыстарын жүргізуде. Бұл жұмыстарға ТЖ қызметінің техникалары да жұмылдырылған. Семей қалалық тұрғын үй — коммуналдық шаруашылығы бөлімінің бас маманы Райгүл Смағұлованың айтуынша, алдымен су көп жиналатын көшелерде жұмыстар атқарылмақ.
— Қазір бірінші кезекте еріген қар суын тартып шығару жүргізілуде. Оған сегіз арнайы техника, бес бірлік мотопомпа, су шығару үшін арнайы машиналар және ТЖ қызметінің мамандары жұмылдырылды, — деді Райгүл Смағұлова, — Бірінші кезекте қаланың анағұрлым су басатын көшелерінде су тарту жұмыстары жүргізілді. Сенбі күні Лесная көшесі мен қаланың орталық аудандарында жұмыстар атқарылды. Бүгінде Найманбаев көшесінде қар суын сору жұмыстары атқарылып жатыр. Бұдан кейін Жансая базары аумағында су сору жұмысы жалғасады.
Сала маманының айтуынша, қалада қар шығару жұмыстары да тоқтамайды. Бұған қоса арықтарды тазарту да қолға алынған. Бір сөзбен айтқанда, қаладағы тұрғын үй секторларын су басу қаупі жоқ.
Су тарту жұмыстарын жүргізу немесе инертті материалдар қажеттілігі бойынша ТҮКШ диспетчерлік қызметінің 56 – 99 – 43 телефонына хабарласуға болады.
Асан МЫРЗАХАНОВ,
«Семей таңы»
