Аягөз ауданында жұмыс сапарымен болған ШҚО әкімі Даниал Ахметов құрылысы жүріп жатқан “KAZ Minerals” кен орнында болды. Кеніштің құрылыс жұмыстарымен аймақ басшысын жауапты топ басқармасының төрағасы Олег Новачук таныстырды.
{jcomments on}Өңір басшысының сапары барысында белгілі болғандай, кен орнының құрылыс жұмыстары жоспарға сәйкес жүріп жатыр. Сәйкесінше, негізгі жабдықтар жеткізіле бастаған. Нысан пайдалануға берілгенде, мұнда 1500 адам жұмыс істейтін болады.
Ақтоғай – бұл ашық типтегі ірі кеніш. Ол Аягөз ауданындағы Ақтоғай кентінің маңында орналас-қан. Кен орнының пайдалану мерзімі – 50 жылдан астам. Кенішті іске қосу үшін 2,3 млрд. АҚШ доллары жұмсалған. Бұл — облыстағы ірі инвестициялық жобалардың бірі болып табылады. Кен орнын іске қосу — ҮИИД мемлекеттік бағдарламасына енген және компанияның ірі екі өркендеу жобаларының бірі (екінші жоба – Павлодар облысындағы Бозшакөл кен орнын игеру). Бұл жобаларды таяу жылдары іске қосу катодты мысты өндірудің көлемін 50%-ға арттыруға мүмкіндік береді.
Олег Новачук сондай-ақ сульфидті кеннің бетінде орналасқан тотыққан кенді шоғырлап сілтісіздендіру 2015 жылдың 4 — тоқсанында басталатынын атап өтті. Бұл — орта есеппен алғашқы 10 жыл ішінде 15 мың тонна катодты мыс шығарылады деген сөз. Сульфидті кеннен өнім өндіру 2017 жылы басталып, алғашқы 10 жыл ішінде катодты эквиваленттегі мыстың орташа шығарылымы 90 мың тоннаны құрайды. Тотыққан кендерді қайта өңдеу жөніндегі кешенді салу, электр жеткізу желілерінің құрылысы, теміржол желілерін салу және оларға қызмет көрсету, жер, бетон жұмыстары сияқты құрылыс науқандарының негізгі көлемін қазақстандық компаниялар жүргізеді.
Қазіргі таңда қазақстандық компаниялардың аталған нысанда жұмыс істеп жүрген қызметкерлерінің саны 1000 адамнан астам. Олардың арасында жергілікті тұрғындар да еңбек етуде. Бас-қарма басшысы кеніш құрылысының жұмыстары жоспарға сәйкес жалғасып, белгіленген мерзімде пайдалануға берілетінін мәлімдеді.
– Бүгінгі күні кен орнында табысты жұмыс атқарып жатқан жастардың еңбекқорлығы көңіл қуантады. Мың жарым жұмыс орны ашылса, Австралия, Чили елдерінен тартылған жаңа технологиялармен кеніште өзіміздің жастар жұмыс істейтін болады. Ақтоғайдың индустриялық келешегіне сенімім зор, – деді Д.Ахметов.
ШҚО Ақпараттық орталығы.
