Үржар аудандық мәдениет үйінде «Қанатты әйелдер» атты әйелдер форумы өтті. Форумға аудандық «Нұр Отан» партиясы төрағасының бірінші орынбасары Бақтыбай Баймұратов, ШҚО облысы әкімінің қоғамдық көмекшісі және облыстық маслихат депутаты Рысхан Жанкүшікова, аудан әкімінің орынбасары Құсайын Сейтқанов, аудандық жұмыспен қамту және әлеуметтік бағдарламалар бөлімінің басшысы Светлана Семенова және аудандағы белсенді аналар қауымы қатысты.
{jcomments on}Үржар аудандық ішкі саясат бөлімінің басшысы Сәуле Жүнісова «Өңірдегі отбасы және гендрлік саясат» тақырыбында баяндама оқыды. Аудандық мәслихаттың кезекті сессиясында аудан бойынша гендерлік саясатты жүзеге асыруда отбасы істері және гендрлік саясат жөніндегі аудандық комиссияның жаңартылған құрамы бекітілгенінен мағлұмат берген Сәуле Орынбайқызы жаңа комиссия аудандық жасөспірімдер істері жөніндегі аудандық комиссиямен, денсаулық сақтау, ішкі істер бөлімдерімен ынтымақтастық жағдайда жұмыс атқаратын болатынын атап өтті.
Форум аясында Рысхан Жанкүшікова шараға қатысушыларды келе жатқан Ұлыстың ұлы күнімен құттықтап, жылы лебізін білдірді.
— Биылғы жылы барлық отбасыға береке — бірлік әкеліп, аңсаған армандары орындалатын жыл болсын. Ауданымызда өтіп жатқан барлық игі істерге әйелдер қауымы атсалысып келеді. Нәзік жандылар ары қарай да қарқынды жұмыстар беретініне сенім мол, — деді Рысхан Жағыпарқызы.
Ал, Светлана Семенова форумның қандай маңыз-ға ие екенін айта отырып, әйел затына, көпбалалы аналарға Үкімет тарапынан жасалынып жатқан же-ңілдіктер мен жәрдемақылар жайына тоқталды. Жалпы, Үкімет тарапынан нәзік жандыларға қамқорлықтың, қолдаудың бар екенін нақты айғақтар келтіре атап өтті.
«Қанатты әйелдер» форумында еліміз үшін үлкен мәнге ие кезектен тыс Президент сайлауын өз дәрежесінде өткізуге атсалысу жайы да талқыланды. Тақырып төңірегінде «Нұр Отан» партиясының XVI съезінің делегаты Бақтыбай Теңізбайұлы съезде айтылған тың бастамаларымен бөлісе отырып, сайлау науқанын өткізуге бір кісідей атсалысуға шақырды. «Ару аналар» ансамблінің мүшесі, зейнеткер Бағи Қуанышбайқызы форумның әйел қауымы үшін қаншалықты мәнге ие екенін атап өтті. Форум соңында қорытынды сөз сөйлеген аудан әкімінің орынбасары Құсайын Сейтқанов та жиналған қауымды келе жатқан Наурыз мерекесімен құттықтап, алдағы маңызды сайлау науқанын бірігіп, сәтті өткізуге шақырды. Форум мәдениет үйінің өнерпаздары арнап әзірлеген концерттік бағдарламасымен жалғасты.
Бауыржан ЖАҚЫП,
«Семей таңы»
