Үлгілімалшы ауылдық округінде Мамай, Сүлеймен, Нұра деген ауылдар бар. Осы ауылдар — қорасы малға, үйлері жанға толған бай-қуатты қасиетті мекен, құтты қоныс. Ауылдық округ әкімі Айтқазы Смағұловтың айтуынша, елінің бірлігі бекем, берекесі мол. Оның себебі әр үйде, әр шаңырақта жастарына үлгі, жасамысына қадірлі, қарттарына сыйлы ата-әжелер бар. Ауылды ұйыстырып, елдіктің қасиетін де сақтайтын — сол абыз аталар мен ардақты аналар. Солардың бірі — Советқан ата Жексенбиновтер әулетіндегі Тұрсын апа.
{jcomments on}Тұрсын апаның шешесі украин ұлтынан екен. Анасының өмір-тарихын айтар болса, әңгімесін сонау Мәскеуден бастайды.
— Украина мен Еділ бойында ашаршылық ерте басталыпты. Сол нәубет кезінде жетім қалған Мария Мәскеуде балалар үйі коммуналарының бірінде болады. Жасы 17-ге келгесін балалар үйінен шығып, өз бетімен күн көруге тура келеді. Қаншама қиындықтар көріп, жиырмадан асқанда осы Көкжайыкқа келіп тұрақтайды. Сол Мария Әділхан Омарбеков деген қазақ жігітіне тұрмысқа шығып, төрт ұл, бір қызды өмірге әкеледі, — деп есіне алады Тұрсын апа. — Әкем ерте қайтыс болды да, бізді шешеміз жеткізді. Шешеміз үйін таза ұстап, жастайынан қазақтың салтын қатты қадірлейтін. Соғым сою, сыбаға қою, наурыз көже істеу дегенді үзбейтін. Ол кезде, дәл бүгінгі күндегідей болмаса да, наурыз, айт деген мерекелер ел ішінде аталып өтетін. Әкемнің шешесі де Мария келініне жөн — жоралғыны үйретіп кетсе керек.
Мен де, ата — енем болмағасын, елдің салтын, халықтың дәстүрін анамның көрсетуімен, абысын – ажын, көршілердің айтуымен үйрендік. Наурыз мейрамы — әулетіміздің басты мерекесі. Өзім ес білгелі “күн мен түн теңеледі, наурыз келеді” дегенді естіп өстім. Ұзынсарыға сақтағанды асып, қазанды майлап, наурыз көже пісіргенді біз де көрдік. Бүгінде қыздарым мен келіндерім — наурыз көженің дәмін келістіріп жасап, сәнімен ұсынатын бір-бір шаңырақтың аналары. Әулетіміздің иесі Советқан аталарыңмен бірге кенжеміз Ерболат пен Айнұрдың қолындамыз,- дейді бүгінгі өміріне қарт ана ризашылығын білдіріп. — Енді ұрпағымның қандай ұлтпен дәм-тұзы жарасса да, бірін-бірі сыйлап өтсе, сол бақыт. Мен анамның украин екенін біліп өстім, украин — маған жат емес, туысқаным. Ал мен өзім болсам сонау нәубет, ашаршылық, соғыс жылдары ешкімді де жатсынбаған қазақтың қызымын. Ұлттарға ынтымақ, еліме тыныштық, халыққа береке тілеймін, — деп батасын берді украин қызы Марияның ұрпағы Тұрсын апа.
Қайрат МӘЛҒАЖДАРОВ,
Көкпекті ауданы.
