Қазақстан Республикасының 2011 — 2020 жылдарға арналған білім беру жүйесін дамыту және осы бағыттағы мемлекеттік бағдарламаны жүзеге асыруда Семей қаласында кешенді жұмыстар атқарылып келеді. Мысалы, орта білім беру жүйесіндегі ең ірі жобаның бірі деп «e-learning» электронды оқыту бағдарламасын айтуға болады. Семей қаласы бойынша «e-learning» бағдарламасы 35 мектепке енгізілген. Жан басына есептеудегі қаржыландыру № 37 мектеп—гимназиясы мен № 10 мектеп базасында қанатқақты жоба түрінде жүзеге асырылуда.
{jcomments on}Сондай –ақ аталған оқу бағдарламасына соңғы 5 жыл көлемінде 15 мектепке дейінгі ұйым енгізілген. Мектепке дейінгі тәрбие беру мен оқытуды қамтамасыз ету көлемі өткен жылдармен салыстырғанда 12,1 пайызға артқан. Мектепке дейінгі жекеменшік мекемелерде мемлекеттік білім беру тапсырысы 1782 орынға дейін жетті.
Қосымша білім беру бағытының да жұмыстары айқын. Қаламызда 2012 жылы көркемөнер мектебі, 2013 жылы жас техниктер станциясы және спорттық шеберлік мектебі ашылып, 6 аула клубы өз жұмысын бастады. Оның 4-уі ауылдық округтерде (Бегалин атындағы орта мектеп пен Озерки, Шүлбі, Жарқын мектептерінде) болса, қалған екеуі Цементшілер кенті мен Локомотив стадионындағы хоккей спорты бойынша балғындарға қызмет көрсететін аула клубтары. Қосымша білім берудің жалпы көрсеткіші 15,7 пайыз-ға артқанын айта кету қажет, 2010 жылы бұл бағыттағы көрсеткіш 25,3 пайыз болса, биыл 41 пайызға жеткен.
2011 жылдан 2015 жылға дейін бірқатар білім беру нысандары бой көтеріп, көпшілігіне күрделі жөндеу жұмыстары жүргізілген. Атап айтатын болсақ, 2010 жылы Суықбастау кентіндегі 400 орындық № 48 орта мектебі салынып, 2011 жылы № 11 орта мектебі жанындағы бұрынғы кәсіптік техникалық мектеп ғимаратына күрделі жөндеу жұмыстары жүргізілген. Ал 2012 жылы Ибраев атындағы орта мектептің қазандығы мен №№ 15, 21, 36 мектептерінің жасанды көгал төселген шағын футбол алаңдары пайдалануға берілді. 2013 жылы № 26 орта мектебінің спорт залы мен Прииртыш орта білім беретін мектебінің қазандығына құрылыс жұмыстары жүргізіліп, №№ 33, 38, 44 мектептерге жасанды көгал төселген шағын футбол алаңдары салынған.
Алдағы уақытта Суықбастау кентінде 230 орындық, Ұшақтар ықшам ауданында 280 орындық балабақшалар мен мемлекеттік — жекеменшік серіктестігі аясында 5 балабақша салынуы, сондай-ақ № 34 орта мектепте 100 орындық шағын орталық пен Степной кентінде 300 орындық, Бобровка кентінде 600 орындық, Ұшақтар ықшам ауданында 1200 орындық бейінді мектептерінің ғимараттары бой көтереді деп жоспарлануда. Чехов көшесі, 123 «А» мекенжайындағы 140 орындық балабақшаға күрделі жөндеу жұмыстары жүргізіледі деп күтілуде.
Айта кету керек, білім саласы бойынша қаржыландыру көлемі 2011 жылмен салыстырғанда 62 пайызға өскен. Жалпы, қаладағы оқушылар саны 2014 – 2015 оқу жылында 42 439-ды құрап отыр. Бұл көрсеткіш 2011 – 2012 оқу жылымен салыстырғанда 2 497 балаға, яғни 5,8 пайызға артқан.
