Кез келген мемлекеттің басты байлығы – дені сау халқы. Бұл ерекшелікті ескерген мемлекетіміз медицина саласына деген қолдауды жыл сайын арттыра түсуде. Саланың дамуының тағы бір айғағы болар, соңғы бес жылда семейліктердің өмір сүру жасы ұлғайып, бала мен ана өлімі азайған.
{jcomments on}Нақты деректер мен цифрларға көз жүгіртсек, тұрғындардың орташа өмір сүру жасының ұзақтығы 66 жастан 69 жасқа артты. 2013 — 2014 жылдар аралығында ана өлімі орын алмай, жаңа туған нәресте өлімі 13,5-тен 11,2 көрсеткішке дейін төмендеді. Сонымен қатар туберкулезбен ауыратындар саны да 116,0 — ден 77,3 пайызға кеміген. Осыдан Семейдің медицина саласының серпінді дамуын анық аңғаруға болады. Әлбетте, статистикалық мәліметтердің біз қуанарлықтай нәтиже беруі де орынды. Себебі жыл сайын жаңа медициналық нысандар бой көтеріп, заманауи құрылғылармен қамтамасыз етіліп, ақ халаттылардың тарапынан халық денсаулығын жақсартуға қосымша мүмкіндіктер жасалып отыр.
2014 жылы мемлекеттік «100 аурухана» бағдарламасы аясында құны 10371,9 млн. теңге болатын 300 орындық жедел медициналық жәрдем ауруханасы іске қосылса, «350 денсаулық сақтау нысандарының құрылысы» атты бағдарлама арқылы Приречное ауылында құны 75,5 млн. теңге болатын дәрігерлік амбулатория есігін айқара ашты. Сондай-ақ, мемлекеттік бағдарламалардан бөлек, қаламызда мемлекеттік — жекеменшік серіктестік аясында да көңіл қуантарлық істер бар.
Сауд Арабиясы Корольдігі мен ШҚО әкімдігі бекіткен меморандум нәтижесінде өткен жылдың күзінде 80 орындық туберкулезге қарсы балалар ауруханасы қолданылуға берілді. Сондай-ақ өңірлік онкологиялық диспансердің жанынан ашылатын брахитерапия, магнитті — резонансты томограф, референс — зертхана және өзге заманауи құрылғылармен қамтамасыз етілетін, медициналық холдингтер қатарына енетін ядролық медицина орталығының құрылысы аяқталуға жақын. Құрылыс жұмысына 7925,5 млн. теңге бөлінген бұл орталық Шығыс Қазақстан және Павлодар өңірінің халқына қызмет көрсететін заманауи жетілген еліміздегі бірден — бір орталық болады деп күтілуде. Айта кетерлігі, ТМД бойынша Ресей мен Беларусь елдерінде ғана бар радионуклидті терапия Семей қаласындағы, осы ядролық медицина орталығынан ашылады деп күтілуде. Осындай қол жеткізген жетістіктерден –ақ Семей қаласының медицина саласы «брендке» айналғанын аңғарамыз.
Қазіргі таңда ҚР Денсаулық сақтау министрлігі, ШҚО әкімдігі, ШҚО Денсаулық сақтау басқармасы, МАГАТЭ ұйымы, СММУ бірлесе атсалысуымен Семейде радиологиялық кластер құрылу жоспарлануда. 2015 жылы жедел медициналық жәрдем стансасының құрылысы аяқталса, денсаулық сақтау саласындағы жағымды жаңалықтарды толықтырып, медициналық даму шеңберімізді кеңейтері анық. Бұл жетістіктермен қоса, гематологиялық және перинаталдық орталықтардың құрылысы да жоспарда бар.
2014 — 2015 жылы Знаменка ауылы мен Бобровка кентінде дәрігерлік амбулатория салу көзделуде. Знаменка ауылындағы амбулатория құрылысы биылғы жылы аяқталады деп жоспарланса, Бобровка кентіндегі амбулатория құжаттары әзірленіп, ШҚО экономика және бюджетті жоспарлау бөліміне жіберілген.
Мемлекеттік медицина университетінің медициналық орталығында нейрохирургиялық және қан тамырлары ауруларына жоғары технологиялы медициналық емдеу көрсетіледі. Науқастарды диагностикадан өткізу және емдеу ісіне жаңа технологиялар енгізілген. 2013 жылы кардиохирургия бөлімі ашылып, өткен жылдың қорытындысы бойынша 889 коронарография жасалған.
2013 жылы мамырда өңірлік туберкулезге қарсы диспансерде «Gen-Xpert» құрылғысы арқылы методикалық әдіс енгізілді. Бұрын науқасқа дәрі тағайындау оңтайлылығы екі немесе төрт ай аралығында бақыланса, бұл құрылғы екі сағатта науқасқа диагностика жасап, қандай дәрі — дәрмек қолдану керектігін лезде анықтауға мүмкіндік береді.
Семей қаласының жедел медициналық жәрдем стансасына 2014 жылы тұңғыш рет тікұшақ берілді. 2015 жылдан бастап тікұшақ АН-2 ұшағына алмастырылды. Санитарлық авиация мамандары 2014 жылы 262 адамға жәрдем жасады. Бұл қала және алыс-жақын аудан халқына жедел, уақтылы және сапалы қызмет көрсетіп, оқыс оқиғаларда адам жанын аман алып қалуға мүмкіндік мол екендігін аңғартады.
Міне, осы жетістіктердің барлығы дерлік ұлт саулығының артуына, халықтың өмір сүру жасының ұзаруына жол ашады. Бір сөзбен айтсақ, Семей қаласының медициналық саласында серпінді даму бар.
