Семей қаласының әкімдігінде жаңа әлеуметтік жобаның таныстырылымы өтті. «Қолғабыс формуласы» атты жоба авторы жеке кәсіпкер — «Худяков В.В.» болса, оны жүзеге асырушы IT-бөлімінің жетекшісі Нұрлан Абдилов. Жоба таныстырылымына қалалық ішкі саясат бөлімінің, үкіметтік емес ұйымдардың өкілдері мен БАҚ қатысты. Жаңа әлеуметтік жоба аясында халықтың әлеуметтік әлжуаз санаттарына компьютерлік технология саласы бойынша тегін қызмет көрсетілетін болады.
{jcomments on}Әлеуметтік жоба аясында мамандар компьютерлік техникаларға қызмет көрсету бойынша бірқатар жұмыстарды тегін атқармақ. Қызмет түрлері халықтың әлжуаз топтарына, атап айтқанда зейнеткерлерге, мүмкіндігі шектеулі жандарға, жұмыссыздар мен көпбалалы отбасыларға арналып отыр. Жоба қолдаушылары — Семей қалалық әкімдігі мен БҰҰ Даму бағдарламасы.
Жобаны жүзеге асырушы Нұрлан Абдиловтің айтуынша, бүгінгі күні компьютер мен ғаламтор көптеген мүмкіндіктерге жол ашуда. Бұл әсіресе қандайда бір себептермен уақыттарын үйлерінде өткізетін азаматтарға үлкен мүмкіндік беруде. Сондықтан да компьютерлік қызмет көрсету сұранысы артып, қызмет түрлеріне қомақты қаражат жұмсалатын көрінеді.
— Орта есеппен алғанда қаламыздың әрбір азаматы компьютер қызметіне 20-30 мың теңге аралығында қаржы жұмсайды, — дейді Нұрлан Абдилов. — Мұндай қаражат жұмсауға әрбір семейліктің қалтасы көтермейді. Міне, «Қолғабыс формуласын» құру идеясы осыдан туындады.
Айта кетуіміз керек, аталған қызмет түрі көптеген шетелдерде жүзеге асқан. Ал Қазақстанда бастама алғаш көтеріліп отыр. Ұйымдастырушылардың айтуынша, қаламызда қайтарымсыз қызмет көрсету төрт жылдан бері жұмыс жасап келеді. Алайда жоба толықтай жүзеге асатын болса, оның ауқымы одан да кеңейе түспек. Жоба туралы толығырақ 32-23-32 телефоны арқылы немесе Әуезов даңғылы, 1 мекенжайынан білуге болады.
Асан МЫРЗАХАНОВ,
«Семей таңы»
