«Ақылдастар» ауыл ардагерлері қоғамдық ұйымының ардагер қарияларының ұйымдастыруымен Жеңістің 70 жылдық мерейтойнына орай «Ерлікті дәріптеу — ұрпаққа сын» атты қалалық мектеп оқушылары арасында байқау өтті.
{jcomments on}Байқаудың мақсаты — Семей өңірінен 1941 — 1945 жылдары неміс басқыншылары тұтқиылдан, ескертусіз бастаған сұрапыл соғысқа Қазақстаннан аттанып, Кеңес Одағының Батыры атағына ие болған батырларымыздың ерлігін ұлықтау. Олардың өмір жолын, майдандағы көрсеткен ерлігін зерттеп, танып — білу және оны жастарға үлгі — өнеге етіп насихаттау. Семей қалалық ішкі саясат және білім бөлімдерінің қолдауымен байқаудың толық ережелері екі ай бұрын мектептерге беріліп, байқау жуырда № 35 жалпы орта білім беретін мектепте қорытыланды. Байқаудың жоғары дәрежеде өтуіне толық мүмкіндік жасаған мектеп ұжымы мен директоры Райгүл Жұмақановаға алғысымызды білдіреміз.
Байқауға қатысуға 10 мектеп электрондық пошта ар-қылы тапсырыс беріп, 9 мектеп қатысты. Әр мектеп өз қалаулары бойынша Кеңес Одағының Батырлары — Қойгелді Ауқадиев, Мұқатай Әбеуілов, Серікқазы Бекбосынов, Зәкәрия Белібаев, Жанғазы Молдағалиев, Айткеш Ибраев, Махмет Қайырбаев, Кенжебек Шәкенов, Қапай Ысқақов және толық «Даңқ», Орденінің иегері Фазыл Әділбаев сынды батыр бабаларының біреуін таңдап алып, жан — жақты зерттеу жүргізді. Байқауға дайындалған топ өздерінің жетекшілерімен бірге батырларды білетін жақын — жуықтарымен және олармен қарым-қатынаста болған қариялармен кездесіп, естеліктер жинақтаған.
Мысалы, № 39 жалпы орта білім беретін мектеп тобы Кеңес Одағының Батыры Серікқазы Бекбосыновты таңдап алып, «Батырды ғасырдан ғасырға паш етеміз» деген тақырыпта бүктеме шығарып, бір топ өңірден шыққан батырлардың суреттерін бас- қан. «Мақсатымыз — ерлікті дәріптеу, ой-өрісімізді дамытып, ерліктің мәнін ұғындыру»,- дейді бүктеме авторлары. № 22 жалпы орта білім беретін мектеп тобы да үлкен дайындықпен келгенін дәлелдеді. Бұлар «Ел үмітін ер ақтар, Ер атағын ел сақтар» деген тақырыпта альбом жасап, өз өнерлерін жан — жақты көрсете білді. №№ 38, 27 жалпы орта білім беретін мектептің «Мұрагер» тобы (жетекшілері А. Аязбаева, А. Садуақасова) «Өлмейтін ерлігіңді дәріптейміз, Өнеге өміріңе еліктейміз» тақырыбында Кеңес Одағының Батыры Зәкәрия Белібаевтің соғыста көрсеткен ерліктері мен елге оралғаннан кейінгі еңбек жолына, өміріне арнап, батырдың ел арасына аңыз болған батырға лайық аңғалдық мінездері мен қызықты оқиғаларымен бөлісті.
Әділ қазылар алқасы байқауға қатысушы оқушылардың шығармашылық өнерлерін тыңдап, бүктеме, альбом, слайдтарын көріп, байқаудың қорытындысын шығарды. I орын № 39 жалпы орта білім беретін мектеп, II орын № № 22, 38 жалпы орта білім беретін мектеп ұжымдарына берілсе, III орынды № № 27, 11 жалпы орта білім беретін мектептер еншіледі.
Сайысқа қатысқан №№ 16, 30, 33, 42 мектеп оқушылары «Жас ізденімпаз», «Жас зерттеуші», «Ерлік — елге мұра, ұрпаққа ұран», «Ер есімі ел есінде» номинациялары бойынша алғыс хаттармен марапатталды.
Патриоттық, отаншылдық байқауына қатысқан оқушылардың тақырыпты зерттеп ашуға деген ынталары мен қызығушылығы, құлшынысы жоғары екенін байқадық. Әлі де болса балалардың дайындығын тереңдете, жетілдіре түсу керектігі де байқаудың қорытындысында айтылды. Қорыта айтқанда, байқаудың жас ұрпаққа да, қатысып тамашалаған ұстаздар қауымына да ой салар тағылымды шара болғаны анық. Әрбір мектепте осындай сайыс-байқаулар өткізіліп тұрса, жас жеткіншектің ой — өрісі жан — жақты дамып, шыңдалып, білімді, рухы биік ұрпақ қалыптасуына мүмкіндік жасалады.
Сағындық БЕЙСЕНБАЕВ,
«Ақылдастар» ауыл ардагерлері қоғамдық ұйымының төрағасы.
