Халықаралық «Қазақ тілі» қоғамы мен № 6 гимназия ұжымының бірлесіп ұйымдастыруымен қалалық Достық үйінде түрлі ұлт өкілдері қатысқан «Менің Қазақстаным» атты шығармашылық ән кеші өтті. Кеште әртүрлі ұлт өкілдері ұлы композитор Шәмші Қал- даяқовтың әндерін орындады.
{jcomments on}Шара аясында № 6 гимназияның жоғары сынып оқушыларының қолымен жасалған қолөнер бұйымдарының көрмесі ұйымдастырылды. Көрмеде күнделікті тұрмыста қолданылатын заттардан жасалған әртүрлі көздің жауын алатын әдемі әшекей бұйымдар, түрлі ұлттар мен ұлыстардың ұлттық құндылығын білдіретін белгілер мен түрлі ұлттың киімдерін киген қуыршақтар қойылған.
— № 6 гимназияда Қазақстан халқы Ассамблея-сының 20 жылдығына орай үлкен шара өткен болатын. Білім ордасының басшысы Майра Ғабасқызының бастамасымен, технология пәнінің мұғалімдері Лариса Курбатова және Берік Өскенбаевтың жетекшілік етуімен сабақ барысында оқушылар әртүрлі ұлттардың костюмдерін тігіп, шараға белсенді қатысты, — дейді аталмыш гимназия мұғалімі Айжан Сләмханқызы.
Кеште өздері тіккен қазақ, орыс, украин, өзбек, дүнген сияқты көптеген ұлттардың киімдерін киген оқушы қыздар сахнаға шығып, сән көрсетті. №6 гимназия директоры Майра Ахметова оқушылардың киімдерін өзі таныстырып өтті. Тек қана біліммен емес, өнерде де, спортта да үнемі жетістіктерге жетіп жүретін оқушыларымен мақтанатынын айтқан Майра Ахметова оқушыларды қолөнер бұйымдарын жасауға, ұлттық киімдер тігуге баулыған технология пәнінің мұғалімдерінің еңбегін ерекше бағалады.
Қалалық білім бөлімінің басшысы Наталья Фесенко мен қалалық Ардагерлер кеңесінің төрағасы Амантай Доғалақов және зиялы қауым өкілдері де көрермендер арасынан табылды. Жалпы, кешті тамашалауға келген көрермендер қатары көп болды. Өзге ұлт өкілдері Шәмші Қалдаяқовтың әнін орындап, бишілер тобы мың бұрала би билеп, көрерменді тәнті етті.
— Өзге ұлт өкілдері балаларының Шәмшінің әндерін шырқауын патриотизм деуге болады. Қазақ тілін салт — дәстүр арқылы және ән арқылы да үйренуге болады. Міне, бұл тұрғыда қазақтың ұлы композиторының әндері өзге ұлт өкілдері балаларының қазақ тілін үйренуіне септігін тигізеді деп ойлаймыз. № 6 гимназияда кіші Ассамблея құрылып, бүгінде мектеп оқушылары әртүрлі ұлттардың ұлттық киімдерін тігуде, — дейді Халықаралық «Қазақ тілі» қоғамының вице-президенті, Қазақстан халқы Ассамблеясының мүшесі Орал Шәріпбаев.
Нұрдәулет КӘКІШЕВ,
«Семей таңы»
