Абай атындағы театрда елімізде өтетін кезектен тыс Президент сайлауына халықты белсене қатысуға үндеуге арналған салтанатты жиын өткізілді. Шараны ұйымдастырған — «Қазақстан – 2050» жалпыұлттық қозғалысы.
{jcomments on}Абай театрында өткен салтанатты жиынның ұйымдастырушылары Қазақстанның дербес, егеменді ел атанғаннан бері ширек ғасырға жуық уақыт ішінде әлеуметтік, экономикалық, саяси тұрғыда дамуда қол жеткізген жетістіктері жайлы жан-жақты ақпарат беріп өтті. Қазақстанның әлем елдерімен өзара қарым-қатынаста, ішкі тұрақтылықты сақтауда ұстанып, жүзеге асырып келе жатқан саясатының арқасында халықаралық аренада зор абырой-беделге ие болып отырғаны туралы айтылды. Этносаралық келісім мен татулықты нығайтуда, ешкімге ұқсамайтын дара да сара жолмен экономиканы өркендетуде атқарып жатқан шаруаларының нәтижесі тұрғысынан Қазақстанның өзгелерге үлгі боларлық деңгейде екені жайында сөз болды.
Жиын барысында сөз алған қалалық наркологиялық диспансердің директоры Павел Брыжахин еліміздің осы күнге дейін қол жеткізген жетістіктері алдағы уақытта заңды жалғасын табуы үшін, барлық азаматтардың келе жатқан кезектен тыс Президент сайлауында белсенділік танытып қана қоймай, бұл саяси науқанға асқан жауапкершілікпен қарап, дұрыс таңдау жасауының маңыздылығын тілге тиек етті.
— Еліміздің бүгінгі күнге дейін қанша асуды бағындырып, қаншама кезеңді еңсергені туралы бәріміз білеміз. Енді бұл игілікті істердің өзінің жемісті жалғасын табуы үшін не істеу керек деген сауал туындайды ғой. Өзім үшін бұл сауалдың жауабы мәлім. Келе жатқан кезектен тыс Президент сайлауына белсене қатысып, дұрыс таңдау жасау керек деп есептеймін. Барлықтарыңызды сайлау науқанында азаматтық құқықтарыңызды тиімді пайдаланып, дұрыс таңдау жасауға шақырамын,- деді қалалық наркологиялық диспансер директоры.
Шара барысында сахна төріне шығып сөз сөйлеген азаматтардың үндеулерінің мазмұны осы мәндес болды. Олардың барлығы жиналған қауымды алда келе жатқан кезектен тыс Президент сайлауында белсенділік танытып, ұсынылған ақпаратты ой елегінен өткізіп, дұрыс таңдау жасауға шақырды. Сондай-ақ шара барысында басқосуға қатысушы жұртшылық жас дарын иелерінің орындауындағы патриоттық әндер мен тамаша билерді тамашалау мүмкіндігін иеленді.
Мирас ҚҰСАЙЫН,
«Семей таңы»
