{jcomments on}Көкпекті аудандық білім бөлімінің ұйымдастыруымен «Ең үздік жас ұстаз» атты облыстық байқаудың аудандық кезеңі болып өтті. Байқауға қатысуға 9 жас маман өтініш білдірген болатын. Әуезов атындағы орта мектебінің география пәні мұғалімі Б.Байгереев, Ж.Шайжүнісов атындағы орта мектептің информатика пәні мұғалімі Ж.Нарбинова, «Октябрь мектеп-балабақша кешені» КММ-нің физика пәні мұғалімі Д.Мергенчинов, Көкжайық орта мектебінің жас маманы Д.Оспанов, Қ.Аухадиев атындағы орта мектебінің математика пәні мұғалімі А.Рахимова, Көкпекті орта мектебінің бастауыш сынып мұғалімі Б.Аубакирова, Новотимофеевка орта мектебінің алғашқы әскери дайындық пәні мұғалімі Т.Қалиев, Амангелді орта мектебінің тарих пәні мұғалімі А.Бибосынова қатысты. Байқауға қатысушылар «Мен болашақтың мұғалімімін», «Мен және менің мамандығым», «Үздік портфолио» кезеңдері бойынша сайысқа түсіп, мұғалім жұмысының кәсіби шеберлігі ұстанымдарын нық сақтайтындығын қазылар алқасына да, қарсыластарына да таныта білді. Б.Байгереев пен Ж.Нарбинова ІІ және ІІІ жүлделі орынды еншіледі. Ал «Октябрь мектеп – балабақша кешені» КММ-нің физика пәні мұғалімі Д.Мергенчинов «Ең үздік жас ұстаз» атты байқаудың облыстық кезеңіне жолдама алған болатын.
Облыстық байқауға өңіріміздің аудандары мен қалаларынан еңбек өтілі әлі бес жылға тола қоймаған жас ұстаздар, жиыны 19 үміткер қатысты.
Байқаудың алғашқы кезеңі жас мамандардың шығармашылық хоббиін көрсетулерінен басталды. Көкпекті ауданының намысын қорғаған «Октябрь мектеп – балабақша кешені» КММ-нің физика пәні мұғалімі Даурен Мергенчинов көпшілік алдында өзінің ұшақ құрастыру және тағы да басқа өнерлерін ортаға салып, көрерменнің көңілінен шықты.
Байқаудың екінші кезеңі де тартысты өтті. Қатысушылар мамандығы жайында мақтана әңгімелеп, «Мен болашақтың мұғалімімін» тақырыбында болашақтың мектебі және сол мектептің дамуына қосар үлесі туралы шағын бейнероликтерін ұсынды. Бейнероликтерді бағалау кезінде қазылар оның эстетикалық нормаға сай болуына, жаңа технологияларды қолдануы мен инновациялық идеясына ерекше мән берді. Бұл кезеңде де Дәурен өз мектебінің болашағын және сол мектептің дамуына өзінің, өз пәнінің қосар үлесін әсерлі көрсете білді. Байқау нәтижесінде әділ қазылардың шешімімен облыстық байқаудың да бас жүлдесін Дәурен Мергенчинов жеңіп алды. Білімді де алғыр ұстазды жеңісімен құттықтай отырып, еңбегіне жеміс тілейміз.
Көкпекті ауданы білім бөлімі.
